دەپۋتات قوناقاسىنا قاتىستى قمدب-عا ۇسىنىس تاستادى

فوتو: ينستاگرام

ءماجىلىس دەپۋتاتى داۋلەت مۇقاەۆ قوعامداعى ماڭىزدى ماسەلەلەردىڭ ءبىرى – اقشاسى جوق بولسا دا قوناقاسىن بەرۋ سالتىن قايتا قاراۋدى ۇسىندى, – دەپ حابارلايدى qandastar.kz

«ۇيىندە ولىك جاتقاندا رەستوراندا ءماز بولىپ تاماق ءىشىپ وتىرعان ادامداردى مەن تۇسىنبەيمىن. قازاقتا «قوناقاسى» دەگەن سالت-ءداستۇر بار. ۇيدە قايتىس بولعان ادام بولاتىن بولسا, ول ۇيدە تاماق ءپىسىرىلىپ, ەشقاشان وت جانبايتىن. كورشى-قولاڭ الىستان كەلگەن قوناقتاردى وزدەرىنىڭ ۇيىنە تاراتىپ, الىپ كەتەتىن بولعان. ءسويتىپ ەرتەسىندە قويىلعاننان (جەر قويناۋىنا تاپسىرىلعاننان كەيىن – اۆت.) كەيىن عانا تاماق بەرىلەدى, قۇران وقىلىپ, كەلۋگە بولاتىن بولعان», – دەلىنگەن ول جاريالاعان ۆيدەودا.

دەپۋتات بۇل جاعدايدىڭ مارقۇمنىڭ جاقىندارىنا قوسىمشا اۋىرتپالىق تۇسىرەتىنىن, قارجىلىق مۇمكىندىگى شەكتەۋلى وتباسىلاردىڭ قارىزعا باتىپ, داستارحان جايۋعا ءماجبۇر بولاتىنىن اتاپ ءوتتى.

«ولىك شىققان ءۇي يەسى ءوز قايعىسىن كوتەرۋدىڭ ورنىنا قوناق كۇتىپ, داستارحان جايۋعا ءماجبۇر بولادى. قارجىلىق جاعدايى ءماز ەمەس وتباسىلار قارىزعا باتسا دا, داستارحان جايۋدان تارتىنبايدى. بۇل شىنىمەن قاجەت پە?» – دەيدى داۋلەت مۇقاەۆ.

وسى ماسەلەنى ول قازاقستان مۇسىلماندارى ءدىني باسقارماسىنىڭ قاراۋىنا ۇسىندى.