Depýtat kúzetshiler, eden jýýshylar men aýla sypyrýshylardyń eńbekaqysyn kóterýdi usyndy

Foto: pixabay.com

Májilis depýtaty Tańsáýle Serikov depýtattyq saýalynda eden jýýshy, aýla sypyrýshy, kúzetshi, vahter sııaqty tehnıkalyq mamandyqtar boıynsha zeınetke shyqqandarǵa qurmetti ataqtar men tós belgiler engizýdi usyndy, dep jazdy qandastar.kz

Bul týraly Stan.kzaqparat agenttigi habarlaıdy.

Depýtat qoǵam nazaryn olardyń mártebesi men eńbek jaǵdaıyn kóterýge aýdardy.

«Biz jumyskerdiń mártebesin kóterý týraly sóz etkende, neni meńzeımiz? Mekemeniń bedelin emes, sol mekemede eńbek etip júrgen qyzmetkerdiń mártebesin kóterý jaıynda sóz bolýǵa tıis. Ásirese qoǵamnyń ómir súrýin qamtamasyz etetin, kózge kórinbeıtin, biraq asa mańyzdy jumys atqaratyn – eden jýýshylar, tehnıkalyq qyzmetkerler, garderobshylar, kúzetshiler, vahterler, aýla sypyrýshylar jáne basqa da kómekshi mamandyq ıeleriniń mártebesi men eńbek jaǵdaıy –ózekti másele», – dedi depýtat.

Ol kóbine basshylyqta otyrǵan nemese negizgi mamandarǵa ǵana nazar aýdarylatynyn atap ótti. Alaıda kúzetshi – bireýdiń ákesi nemese aǵasy, al eden jýýshy – bireýdiń anasy nemese ápkesi emes pe?

«Iá, olardyń eńbegi bedeldi mamandyqtar qataryna jatpaýy múmkin, biraq biz olardy qurmettep, adamı, azamattyq jáne áleýmettik mártebesin kóterýge mindettimiz. Olardyń da balalary bar. Olar «Meniń anam – eden jýýshy bolǵan, ákem – aýla sypyrýshy bolǵan» dep maqtanyshpen aıta ala ma? Biz solaı aıtatyndaı jaǵdaı jasaýymyz kerek. Búginde bul jumyskerlerdiń jalaqysy eldegi ortasha deńgeıden áldeqaıda tómen. Aýyr fızıkalyq eńbekke qaramastan, olar áleýmettik qorǵaýdan, jeńildikter men kásibı qoldaýdan jıi tys qalyp otyr», – dedi Tańsaýle Serikov.

Májilis depýtaty bul qyzmetkerler bir kún jumysqa shyqpaı qalsa, kósheler qoqysqa tolyp, keńselerdi shań basyp, tazalyq ketetinin aıtty.

«Nege biz bul máselege jetkilikti kóńil bólmeımiz? Aýla sypyrýshylarmen jáne tehnıkalyq qyzmetkerlermen sóıleskende, olar az jalaqy, jeńildikterdiń joqtyǵy jáne áleýmettik mensinbeýshilik úırenshikti shyndyqqa aınalǵanyn aıtady. Qazirgi tańda negizgi máseleler qatarynda tómen eńbekaqyny, naqty áleýmettik mártebeniń bolmaýyn, saýyqtyrý jáne demalys múmkindikteriniń shekteýli ekenin, kásibı ósý men qaıta daıarlaý jaǵdaıynyń jetispeýshiligin atap ótýge bolady», – deıdi depýtat.

Depýtattyń unysyny boıynsha, árbir memlekettik jáne kvazımemlekettik mekeme:

— osy sanattaǵy qyzmetkerlerge jylyna bir ret mekeme esebinen shıpajaıǵa joldama berýi;

— 13-shi jalaqy tóleýi;

— jyl saıyn eńbek demalysyna shyqqanda eki eńbekaqy kóleminde qosymsha járdemaqy berýi;

— tegin oqytý jáne kásibı qaıta daıarlaýdy qamtamasyz etýi;

— zeınetke shyqqan tehnıkalyq mamandyq ıelerine qurmetti ataqtar men yntalandyrý túrlerin engizýi qajet.

«Biz kún saıyn taza keńsege kirip, taza kóshelermen júrip, jyly qabyldaýǵa úırenip qaldyq. Biraq osynyń artynda «kórinbeıtin» eńbek ıeleri – myńdaǵan jumysshy turǵanyn umytpaýymyz kerek. Bul tek materıaldyq turǵydaǵy másele emes – bul adamgershilik pen ádildik máselesi. Jumysshy mamandyqtar jyly jaı ǵana ádemi uran bolyp qalmaýy kerek. Ol naqty árekettermen toltyrylýy kerek. Al alǵashqy qadam – kásibı ıerarhııanyń eń tómengi satysyndaǵy adamdarǵa qamqorlyq jasaý», – dedi depýtat.

Sondaı-aq ol osy sanattaǵy qyzmetkerlerdiń jalaqysyn kóterýdi qarastyrýdy usyndy.

«Olarǵa «qoǵamdyq mańyzy bar kásip ıeleri» degen mártebeni zań júzinde bekitý; jyl saıyn memlekettik kvota esebinen tegin shıpajaı joldamalaryn úlestirý júıesin engizý; qaıta daıarlaý jáne kásibı ósý kýrstaryna tegin qatysý múmkindigin qamtamasyz etý; eden jýýshy, aýla sypyrýshy, garderobshy syndy tehnıkalyq mamandyq boıynsha zeınetke shyqqandarǵa qurmetti ataqtar men tósbelgiler engizý múmkindigin qarastyrý qajet», – degen usynys bildirdi depýtat.