جاڭالىقتار
دەپۋتات ءلاززات اسانوۆاعا “حالىق قاھارمانى” اتاعىن بەرۋ تۋرالى ۇسىنىس ايتتى
فوتو: الاش.كز
ءماجىلىس دەپۋتاتى, Respublica پارتياسىنىڭ توراعاسى ايداربەك قوجانازاروۆ جەلتوقسان كوتەرىلىسىندە كوز جۇمعان قازاقتىڭ باتىر قىزى لياززات اسانوۆاعا «حالىق قاھارمانى» اتاعىن بەرۋ تۋرالى ۇسىنىس ايتتى, دەپ حابارلادى qandastar.kz Alash.kz ۇلتتىق پورتالىنا سىلتەمە جاساپ.
«قۇرمەتتى اعايىن, سىزدەرمەن تاۋەلسىزدىك كۇنى قارساڭىندا كوپتەن بەرى ويىمدا جۇرگەن ءبىر اڭگىمەنى بولىسسەم دەيمىن.
“حالىق قاھارمانى” دەگەن اتاق ەلىمىزدىڭ بوستاندىعى مەن تاۋەلسىزدىگى جولىنداعى ەرلىگى ءۇشىن بەرىلەتىن ەڭ جوعارعى ماراپات. ەگەمەندىك العالى بۇل اتاقتى 36 ادامعا تابىستاپپىز. بىراق سونىڭ تەك 2-ءى ايەل كىسى ەكەن. ءبىرىنشىسى حيۋاز دوسپانوۆا. ەكىنشىسى روزا باعلانوۆا…
ايتايىن دەگەنىم, مەن 1986 جىلى نامىستىڭ تۋىن جەلبىرەتىپ, كەيىن جۇمباق جاعدايدا كوز جۇمعان ءلاززات اسانوۆاعا “حالىق قاھارمانى” اتاعىن بەرەتىن ۋاقىت كەلدى دەپ ويلايمىن.
بۇل ماسەلە بۇعان دەيىن بىرنەشە رەت ايتىلدى. ءلاززاتتىڭ اناسى مارقۇم التىناي اپاي دا وسى تۋرالى كوپ ايتتى. اتتەڭ, بىراق قولى جەتپەدى. تۋراسىن ايتساق, قازاق حالقى ءلاززات اسانوۆاعا باتىر دەگەن اتاقتى باياعىدا بەرىپ تاستاعان. ەندى مۇنى قۇجاتپەن بەكىتىپ, نۇكتەسىن قوياتىن كەز جەتتى عوي دەيمىن. بۇل ماسەلەنى اياقسىز قالدىرماۋ تاريح الدىنداعى ءبارىمىزدىڭ بورىشىمىز. ال ونى رەسمي تۇردە جاريالاۋ كەلەشەك ۇرپاق ءۇشىن تاربيە-ونەگە, ءوز ەلىن ءسۇيىپ, قۇرمەتتەۋدىڭ اسقان ۇلگىسى بولار ەدى. قولدايسىز با?», — دەپ جازدى ايداربەك قوجانازاروۆ.
