دەپۋتات مارقۇم بەردىبەك ساپارباەۆ تۋرالى پىكىر ءبىلدىردى

فوتو: اشىق دەرەككوز

ءماجىلىس دەپۋتاتى ۇلىقبەك تۇماشينوۆ «Adal Adam» youtube-ارناسىنا بەرگەن سۇحباتىندا مارقۇم, مەملەكەت جانە قوعام قايراتكەرى بەردىبەك ساپارباەۆ تۋرالى پىكىر ءبىلدىردى. دەپۋتات بەردىبەك ماشبەك ۇلىنىڭ شىعىس قازاقستان وبلىسىنا اكىم بولعان تۇستا اتقارعان جۇمىسى تۋرالى وي بولىسكەن. اسىرەسە, توتەنشە جاعداي كەزىندەگى ارەكەتىن ەرەكشە اتادى, دەپ جازدى qandastar.kz

«بەردىبەك ماشبەك ۇلى شىعىس قازاقستان وبلىسىن باسقارعان ساتتە ول كىسىنىڭ مەنتاليتەتى ءبىزدىڭ ەلدىڭ مىنەز-قۇلقىنا سايكەس كەلمەگەنى راس. ول كىسى قازاقى, ءبىز «ورىسشالاۋ» وسكەنبىز. العاشقى كەزدە تۇسىنبەۋشىلىك بولدى, بىراق كەيىن ول كىسى وتە جاقسى قىزمەت اتقاردى. مىسالى, كوكتەمگى سۋ تاسقىنىنان ەكى اۋىلدى سۋ باسىپ قالعان ەدى. سول كەزدە جىلدام ارەكەت جاسادى. تۇندە سۋعا كەتكەن اۋىلعا تاڭەرتەڭ تىكۇشاقپەن بارىپ, بارىمىزگە جاۋاپتى مىندەت جۇكتەگەنى ەستە. اۋىل تۇرعىندارى ءۇشىن قاۋىپسىز ايماقتان بىرىمىزگە مەكتەپ سالۋدى, بىرىمىزگە ءۇي سالۋدى تاپسىردى. 6 ايدىڭ ىشىندە تۇرعىندارى ءۇشىن جاڭا ەلدى مەكەننىڭ قۇرىلىسى اياقتالىپ, ينفراقۇرىلىمىن, الەۋمەتتىك نىساندارىن تولىق بىتكەن بولاتىن», — دەدى ول.

سونداي-اق سۇحبات بارىسىندا ساپارباەۆتىڭ وسكەمەن قالاسىن قازاقىلاندىرۋعا قوسقان ۇلەسى دە ايتىلعان.

«راسىن ايتقاندا, وسكەمەن قالاسىن قازاقىلاندىرعان بەردىبەك ماشبەك ۇلى. ءتىپتى اكىمشىلىك الدىنداعى لەنين ەسكەرتكىشىن الىپ تاستاپ, ورنىنا حاكىم ابايدىڭ ەسكەرتكىشىن قويدى. 60 پايىزداي باسقا ۇلت وكىلدەرى تۇراتىن وڭىردە مۇنداي شەشىم شىعارۋ وڭاي ەمەس», — دەدى ۇلىقبەك شابدان ۇلى.