دەپۋتات مەكتەپ باعدارلاماسىنىڭ تىم اۋىر ەكەنىن ايتتى

فوتو: Pixabay

قازاقستاندىق وقۋشىلارعا شامادان تىس كوپ وقۋ مىندەتتەلگەن. بۇل تۋرالى سەنات دەپۋتاتى التىنبەك نۋح ۇلى ايتتى, دەپ حابارلايدى Qazaq Today اقپارات اگەنتتىگى Stan.kz — كە سىلتەمە جاساپ. 

سونىمەن قاتار, ول وقۋلىقتار وقۋشىعا تۇسىنۋگە قيىن عىلىمي تىلدە جازىلاتىنىن ايتادى.

سەناتوردىڭ سوزىنشە, ءبىلىم ساپاسى جاعىنان العا كەتكەن جاپونيا, وڭتۇستىك كورەيا, فينليانديا جانە كانادا سياقتى ەلدەردە 7-8 سىنىپتا ناقتى عىلىمعا قاتىستى 4-6 ءپان وقيدى, ال قازاقستاندا 15 ءپان, ال 9 سىنىپتا ءتىپتى 16 ءپان وقىتىلادى. ال بىزدە مىندەتتى وقۋ پاندەرىنىڭ سانى 2,5 ەسە كوپ.

سونىمەن قاتار, حيميا, بيولوگيا جانە گەوگرافيا سياقتى وقۋ پاندەرى شەتەلدىڭ مەكتەبىندە ءبىر «عىلىم» پانىنە بىرىكتىرىلىپ, وتە از ۋاقىت وقىتىلادى. وسىعان قاراماستان, سوڭعى 15 جىلداعى حالىقارالىق PISA زەرتتەۋىنىڭ قورىتىندىسى بويىنشا وسى ەلدەردەگى وقۋشىلاردىڭ جاراتىلىستانۋ عىلىمى بويىنشا ساۋاتتىلىعى جوعارى بولىپ وتىر. بۇل پاندەر سانىنان وقىتۋ ساپاسى ماڭىزدى ەكەنىن كورسەتەدى.

«قازاقستاندا مەكتەپ وقۋشىلارىنا تاقىرىپ بويىنشا شامادان تىس كولەمدى اقپارات بەرىلەدى جانە وقۋلىقتاردىڭ ءتىلى اۋىر ءارى عىلىمي سيپاتتا بەرىلەدى. ال وزىق ەلدىڭ تاعى ءبىرى ۇلىبريتانيادا – كەرىسىنشە, اقپارات كولەمدى ەمەس, تاقىرىپتار تاجىريبەگە باعىتتالىپ, كۇندەلىكتى ءومىردىڭ جاعداياتتارىمەن بايلانىستىرىلىپ وقىتىلادى. باسقاشا ايتقاندا, وقۋشىنىڭ الداعى ومىرىندە پراگماتيكالىق تۇرعىدان قانشالىقتى ماڭىزدى ەكەنىن تۇسىندىرۋگە كوپ كوڭىل بولىنەدى, ياعني وقۋشىلاردىڭ قۇزىرەتتىلىگىن قالىپتاستىراتىن ناتيجەگە باعدارلانعان ءبىلىم بەرىلەدى. ورتا ءبىلىم بەرۋ سالاسىندا ساپالى ءبىلىم بەرۋ ءۇشىن, وقۋشىلارعا زامان تالابىنا ساي ءبىلىم بەرۋ مازمۇنىن جاساۋ كەرەك. ورتا ءبىلىم بەرۋ ساپاسىن كوتەرۋدىڭ كونتسەپتسياسىنا سايكەسىنشە وزگەرىستەر ەنگىزىلۋى كەرەك دەپ ەسەپتەيمىز», — دەدى التىنبەك نۋح ۇلى.