جاڭالىقتار
دەپۋتات مينيستردەن ءمامس قورىندا جەمقورلىققا جول اشقان بۇيرىقتى نەگە جويماي وتىرعانىن سۇرادى
فوتو: اشىق دەرەككوز
دەپۋتات مينيستردەن ءمامس قورىندا جەمقورلىققا جول اشقان بۇيرىقتى نەگە جويماي وتىرعانىن سۇرادى, دەپ جازدى qandastar.kz
باقىتجان بازاربەكتىڭ ايتۋىنشا, ءمامس قورى قارجىلىق ەسەپ جۇرگىزبەيدى. بۇل 2020 جىلى 24 جەلتوقساندا دەنساۋلىق ساقتاۋ مينيسترلىگىنىڭ بۇيرىعىمەن بەكىگەن. (اۆت. ول كەزدە مينيستر الەكسەي تسوي ەدى). سونىڭ كەسىرىنەن جىمقىرۋ, سىبايلاس, جەمقورلىق پەن ولقىلىقتاردىڭ ءبارى ورىن الىپ وتىر. جوعارى اۋديت پالاتاسى وسىنداي قورىتىندى جاساعان.
«سىزدەردىڭ الدارىڭىزدا ءمامس قورىنداعى جەمقورلىقتىڭ كوزىنە اينالعان 2020 جىلعى بۇيرىق. بۇل زاڭعا قايشى, قارجى جىمقىرۋ مەن جەمقورلىقتى تۋدىراتىن قۇجات. بۇل بۇيرىقتى ءسىز قابىلداماعانىڭىزدى بىلەمىن. بىراق مينيستر قىزمەتىنە كەلگەننەن بەرى ءسىز وسى بۇيرىقتى وزگەرتۋىڭىز كەرەك ەدى عوي. ونىڭ ۇستىنە سەناتور بولعاندا وسى بۇيرىقتى ءجيى سىناعان ەدىڭىز. ايتىڭىزشى, بۇيرىقتى قاشان جوياسىز?»,- دەدى بازاربەك.
atamekenbusiness_qaz حابارلاعانداي, دەنساۋلىق ساقتاۋ ءمينيسترى بۇيرىقتىڭ كۇشى جويىلمايتىنىن, تەك وزگەرىس ەنگىزىلەتىنىن ايتتى.
«ءبىز ولقىلىقتاردى جويۋ ءۇشىن 1 شىلدەگە دەيىن وزگەرىس ەنگىزەمىز. ءتيىستى ورگاندارعا ماتەريالداردى جولدايمىز», — دەپ سەندىردى.
