دەپۋتات مۇعالىمدەر جەتىسپەۋشىلىگىن جوققا شىعاردى

فوتو: ەك

ءماجىلىس دەپۋتاتى اسحات ايماعامبەتوۆ «استانا» تەلەارناسىنىڭ SHYNDYK LIVE باعدارلاماسىنا بەرگەن سۇحباتىندا مۇعالىمدەردىڭ جالاقىسى, پەداگوگتاردىڭ جەتىسپەۋشىلىگى مەن ءبىلىم بەرۋ سالاسىنداعى ماسەلەلەر جونىندە ايتتى, دەپ جازدى qandastar.kz

«ءبىز مۇعالىمدەردىڭ ايلىعىن ءۇش ەسە كوتەردىك. بۇگىن ولار باسقا سەكتوردا جۇمىس ىستەيتىن ادامداردان, ءتىپتى كورشى ەلدەردەگى ارىپتەستەرىنەن جوعارى جالاقى الادى», – دەيدى دەپۋتات.

الايدا 10 مىڭ پەداگوگ جەتىسپەيتىنى تۋرالى اڭگىمەنىڭ شىندىققا جاناسپايتىنىن ايتادى. ونىڭ سوزىنشە استانا سياقتى ءىرى قالالاردا قازاق ءتىلى مەن دەنە شىنىقتىرۋ مۇعالىمدەرىنە ۆاكانسيا جەتىسپەيدى. سىنىپتار بىرىكتىرىلگەن, وقۋ ساعاتى از اۋىلدىق جەرلەردەگى شاعىن مەكتەپتەردە شىنىمەن مۇعالىم جەتىسپەۋشىلىگى بار. ول مەكتەپتەردە جۇكتەمە از. قانداي ماتەماتيكا نەمەسە اعىلشىن ءپانى مۇعالىمى 0,5 ستاۆكاعا جۇمىس ىستەۋگە كەلەدى?

«جىل سايىن پەداگوگيكالىق باعىتتاعى جوعارى وقۋ ورىندارى 40 مىڭعا جۋىق مۇعالىم دايىنداپ شىعارادى. بىراق ولاردىڭ كوبى, اسىرەسە دەنە شىنىقتىرۋ جانە قازاق ءتىلى ماماندارى جۇمىس تابا المايدى. سەبەبى نارىقتا بۇل ماماندار كوپ», – دەدى ول.