ءبىلىم
دەپۋتات نازارباەۆ ۋنيۆەرسيتەتىندەگى جاعدايدى باياندادى
ءماجىلىس دەپۋتاتى اسحات ايماعامبەتوۆ «نازارباەۆ ۋنيۆەرسيتەتىنىڭ» دەكان لاۋازىمىنا وتاندىق مامانداردى المايتىنىنا شۇيلىكتى, دەپ حابارلايدى Skifnews.kz اقپارات پورتالى.
جاقىندا دەپۋتات جاڭا رەكتورمەن كەزدەسىپ, ۋنيۆەرسيتەتكە قاتىستى بىرقاتار جايتتى اڭعارعان.
«قازىرگى باسشىلىق رەيتينگتەرگە باسىمدىق بەرىپ وتىر. ۋنيۆەرسيتەت تەك رەيتينگ ءۇشىن جۇمىس ىستەي باستاعاندا, باستى نازار باسقا باعىتقا اۋىسادى. ءيا, حالىقارالىق تىزىمدەردە جوعارى ورىن الۋ – بەدەل مەن مارتەبە تۇرعىسىنان ماڭىزدى. بىراق ءبىلىم بەرۋ جۇيەسىندە باسقا دا كورسەتكىشتەر ەسكەرىلۋى ءتيىس. ونىڭ ۇستىنە, بۇگىنگى ناتيجەلەر وسىدان 5–6 جىل بۇرىنعى جۇمىستىڭ جەمىسى», – دەپ جازدى ول تەلەگرام ارناسىنداعى پاراقشاسىندا.
سوزىنشە, ۋنيۆەرسيتەت العاش قۇرىلعاندا شەتەلدىك پروفەسسورلار مەن مەنەدجەرلەردىڭ كومەگىمەن دامىدى.
«العاشقى كەزەڭدە بۇل ورىندى شەشىم بولدى. بىراق 15 جىلدان استام ۋاقىت ءوتتى. لوگيكالىق تۇرعىدان العاندا, قازاقستاندىق عالىمدار مەن باسقارۋشىلاردىڭ اكادەميالىق ورتاعا بىرتىندەپ ينتەگراتسيالانۋىن كۇتۋىمىز كەرەك ەدى. ارينە, شەتەلدىك پروفەسسورلار مەن باسشىلاردىڭ ۇلەسى ساقتالۋى كەرەك, بىراق قازاقستاندىق ماماندار ءۇشىن دە مۇمكىندىكتەر جاسالۋى ءتيىس. بۇل جەردە دە بالانس قاجەت», – دەپ اتاپ ءوتتى دەپۋتات.
اسحات ايماعامبەتوۆ قازاقستاندىق قىزمەتكەرلەر ءالى كۇنگە دەيىن نەگىزىنەن اكىمشىلىك بلوكتاردا جۇمىس ىستەيتىنىن جەكتىزدى. ياعني, ولار كوبىنەسە كومەكشى پەرسونال رەتىندە عانا قىزمەت اتقاراتىن كورىنەدى.
«ال بىزدە ليگا پليۋششا, وكسفورد, MIT جانە الەمنىڭ جەتەكشى ۋنيۆەرسيتەتتەرىندە ءبىلىم العان, تاجىريبە جيناقتاعان جوعارى دەڭگەيلى ماماندار بار. نەگە ولار نازارباەۆ ۋنيۆەرسيتەتىنىڭ اكادەميالىق نەگىزىنىڭ ءبىر بولىگى بولا المايدى? قازىرگى ۋاقىتتا ۋنيۆەرسيتەتتەگى دەكانداردىڭ ىشىنەن تەك بىرەۋى عانا – قازاقستان ازاماتى. پروۆوست نەمەسە باسقا فاكۋلتەت دەكاندارى قازاقستاندىق ەمەس», – دەدى ءماجىلىس دەپۋتاتى.
فوتو:informburo
ماجىلىسمەن نازارباەۆ ۋنيۆەرسيتەتى ەلدىڭ ءبىلىم بەرۋ ەكوجۇيەسىنىڭ اجىراماس بولىگى بولعىسى كەلسە, وندا جابىق كلۋب مودەلىنەن باس تارتۋى ءتيىس ەكەنىن باسا ايتتى, دەپ جازدى qandastar.kz
«قازاقستاندىق عالىمدار مەن باسقارۋشىلاردى بەلسەندى تۇردە تارتۋى كەرەك. ءوز تاجىريبەسىن كەڭىرەك تاراتىپ, قازاقستاندىق مەكتەپتەر مەن جوعارى وقۋ ورىندارىمەن تىعىز ىنتىماقتاستىق ورناتۋى قاجەت», — دەپ ۇسىندى دەپۋتات.
