Depýtat Nıkıta Shatalov jelidegi syndy etnıkalyq tegimen baılanystyrdy

Foto: ashyq derekkóz

QR Parlamenti Májilisiniń depýtaty, «Amanat» partııasynyń múshesi Nıkıta Shatalov áleýmettik jelilerde qazaqstandyq paıdalanýshylardyń synyna tap bolǵanyn málimdedi, dep habarlaıdy qandastar.kz

Depýtattyń aıtýynsha, bul syn onyń etnıkalyq tegimen baılanysty.

«О́kinishke qaraı, mundaı pikirlerdiń paıda bolýyn tek meniń etnıkalyq orys ekendigimmen baılanystyrýǵa týra keledi. Basqa eshqandaı sebebi joq», – dedi Shatalov Májilis dálizinde jýrnalısterge bergen suhbatynda.

Depýtat óziniń barlyq qoǵamdyq jáne syrtqy saıasatqa qatysty málimdemelerinde Qazaqstannyń ulttyq múddesin birinshi orynǵa qoıatynyn atap ótti. Sonymen qatar, ol keıbir azamattardyń aqparatty burmalap, oǵan tıesili emes dáıeksózderdi taratyp jatqanyn aıtty.

Aıta keteıik, aqpan aıynda Shatalov Telegram-arnasynda Ýkraına bıligin Kaspıı qubyr konsorıýmyna dron arqyly shabýyl jasaǵany úshin synǵa alǵan bolatyn. Ol bul áreketti Qazaqstannyń ekonomıkalyq múddelerine qarsy jasalǵan agressııa dep baǵalap, ýkraın tarapyn jaýapqa tartý qajettigin málimdedi. Onyń aıtýynsha, konsorıým arqyly ótetin munaıdyń 90%-y – Qazaqstanǵa tıesili.

Budan bólek, depýtat Ýkraına prezıdenti Vladımır Zelenskııdiń AQSh-tyń sol kezdegi prezıdenti Donald Tramppen Aq úıdegi kezdesýine qatysty da syn aıtqan. Onyń pikirinshe, Reseı Ýkraınanyń beıbitshilik ornatý máselesinde «kóp kelisimge kelýge daıyn ekenin» bastapqyda-aq kórsetken.

Shatalovqa qatysty syn áleýmettik jelilerde onyń osy málimdemelerinen keıin kúsheıgen.