جاڭالىقتار
دەپۋتات پرانك جاسايتىن بلوگەرلەرگە شۇيلىكتى
فوتو: اشىق دەرەككوز
ءماجىلىس دەپۋتاتى ماقسات مالىك ۇلى تولىقباەۆ ىشكى ىستەر ءمينيسترى ەرجان سادەنوۆكە دەپۋتاتتىق ساۋال جولداپ, قوعامدىق قاۋىپسىزدىككە تىكەلەي قاتەر ءتوندىرىپ وتىرعان جايتتارعا ناقتى شارالار قابىلداۋدى سۇرادى.
حالىق قالاۋلىسى ءوز ساۋالىندا سوڭعى ۋاقىتتا قوعامدا كۇش قولدانۋ, پىشاقتاسۋ, ارنايى جاساققا ەلىكتەۋ سىندى جالعان پرانك كونتەنتتەردىڭ كوبەيىپ, ەل ىشىندە ۇرەي تۋعىزعانىنا نازار اۋداردى. دەپۋتات بۇل ارەكەتتەردىڭ ازاماتتاردىڭ پسيحولوگيالىق قاۋىپسىزدىگى مەن ەلدىڭ حالىقارالىق يميدجىنە ايتارلىقتاي زيان كەلتىرىپ وتىرعانىن ايتتى.
دەپۋتات شەرزات پولاتتىڭ قازاسى تۋرالى ايتتى. 16 جاستاعى بالانىڭ جاۋىزدىقپەن ءولتىرىلۋى ەلدى ءدۇر سىلكىندىرگەن ەدى. دەپۋتاتتىڭ ايتۋىنشا, قاسكويلەردىڭ تەرگەۋ يزولياتورىندا جەڭىلدىكپەن وتىرۋى قوعامدا «اقشالى ادام جازادان سىتىلىپ كەتە مە?» دەگەن كۇمان تۋدىرعان.
«16 جاسار بالانى اياۋسىز ولتىرگەندەر قاتاڭ جازاعا تارتىلۋى كەرەگىن تالاپ ەتتىك. اعايىننىڭ كەۋدەسىن اشۋ كەرنەپ وتىرعاندا شەرزاتتىڭ ولىمىنە كۇدىكتى رەتىندە قامالعانداردىڭ ۋاقىتشا ۇستاۋ يزولياتورىندا ءان تىڭداپ, ءتاتتى جەپ, ۇيالى تەلەفون پايدالانىپ, ۋايىمسىز ويناپ-كۇلگەنىن كوردىك. جۇرت جاعاسىن ۇستادى, ارتىنشا قىزمەتكەرلەر جازالاندى. بىراق بۇل «اقشاسى باردىڭ اباقتىدادا مۇرتىن بالتا شاپپايدى دەگەن راس ەكەن-اۋ» دەگەن ويعا قالدىردى. جۋىردى اتالعان ءىس بويىنشا سوت باستالدى. ايىپتاۋ اكتىسىن وقىعان پروكۋرور ەلدىڭ ەسىن ەكەۋ, ءتۇسىن تورتەۋ قىلدى. قاسكويلەر اناسى مەن اجەسىنىڭ كوزىنشە شەرزاتتىڭ جۇرەك تۇسىنا پىشاق سۇعىپ, ارتىنشا باسىنان مىلتىقتىڭ دۇمىمەن ۇرعان. بۇل سۇمدىقتى كوزىمەن كورىپ بالاسىنا كومەكتەسپەك بولعان انانى تاعى ەكى قاسكوي جىبەرمەي ۇستاپ تۇرعان. بۇل سۇمدىق ەمەس پە? قاۋىپسىز قوعامدى قاۋىپ-قاتەردىڭ ورتاسىنا اينالدىرعاندار ۋاقىتىندا نەگە جازاسىن الماعان? سۇراق كوپ. شەرزاتتىڭ قازاسىنا قاتىستى سوت ونلاين ءوتسىن دەگەن تالابىمىز ورىندالدى. ەندى شەشىمنىڭ ءادىل بولۋىن جاۋاپتى ورگاندار قامتاماسسىز ەتۋى شارت», – دەدى دەپۋتات.
ول سونداي-اق جامبىل وبلىسى مەركى اۋدانىندا بولعان تاعى ءبىر اۋىر وقيعانى تىلگە تيەك ەتتى. شەتەل ازاماتى – موتوتسيكلشىنىڭ كۇندىز بەينەكامەرالاردىڭ كوز الدىندا ەكى مارتە پىشاقتالۋى – ەل ىشىندەگى ءتارتىپ پەن قاۋىپسىزدىك دەڭگەيىنە قاتىستى ۇلكەن سۇراق تۋعىزدى.
تولىقباەۆ سوڭعى جىلدارى الەۋمەتتىك جەلىلەردە تاراپ جاتقان اگرەسسيۆتى «پرانك» بەينەروليكتەردىڭ قاۋىپتىلىگىن ەرەكشە اتاپ ءوتتى. وندا اكتەرلەر جالعان پىشاقتاسۋ, توبەلەس جانە ارنايى جاساققا ەلىكتەۋ ارقىلى قوعامدا دۇربەلەڭ تۋعىزاتىن كورىنىستەردى شىنايى ءتۇسىرىپ, ونى «ءازىل» دەپ اقتاپ شىعادى.
«جالعان پىشاقپەن ويناپ جۇرگەندەر جۇرتتى شوشىتىپ ءجۇر. ەندى بىرەۋ پىشاق الا جۇگىرسە, بۇل شىن با, الدە پرانك پا دەپ قاراپ تۇرۋىمىز كەرەك پە? ويىننان وت شىعادى. مۇنداي ارەكەتتەر – زاڭمەن قاتاڭ رەتتەلۋى ءتيىس», – دەدى دەپۋتات.
دەپۋتاتتىڭ ايتۋىنشا, ارنايى جاساقتىڭ كيىمىنە ۇقساس فورمالاردى كيىپ, جالعان قۇجات كورسەتىپ, ادامداردى «قۇرىقتاپ», كەيىننەن بارلىعىن پرانك دەپ تۇسىندىرەتىن ارەكەتتەر – قوعامداعى ۇرەيدى ارتتىرىپ وتىر. مۇنداي ازىلدەر ادام دەنساۋلىعىنا دا قاۋىپ توندىرەدى.
«قالجىڭداماق بولعان ادامنىڭ قان قىسىمى كوتەرىلىپ, جۇرەك تالماسى ۇستاسا, كىم جاۋاپتى?» – دەپ سۇرادى ول.
تولىقباەۆ ءىىم ۆيتسە-ءمينيسترىنىڭ پرانك جاساۋشىلار كيىمدەرىنىڭ ارنايى قىزمەت فورماسىنا ۇقسامايتىنى جونىندەگى جاۋابىمەن كەلىسپەيتىنىن ءبىلدىرىپ, حالىققا ونداي ايىرماشىلىقتى اجىراتۋ قيىن ەكەنىن ايتتى.
دەپۋتات مينيسترلىككە ناقتى ۇسىنىس ايتتى:
- قاۋىپتى پرانك كونتەنتتەردىڭ اۆتورلارىن انىقتاپ, ولارعا قاتاڭ ەسكەرتۋ بەرۋ;
- ولاردىڭ قولىنداعى جالعان قارۋ-جاراقتاردى تاركىلەۋ;
- قۇقىق قورعاۋ ورگاندارىنىڭ بەدەلىن تۇسىرەتىن ارەكەتتەردى زاڭمەن شەكتەۋ;
- ازاماتتاردىڭ پسيحولوگيالىق قاۋىپسىزدىگىن قامتاماسىز ەتۋ بويىنشا شارا قابىلداۋ.
«ادام قورقىتۋدى, ارنايى وپەراتسياعا ەلىكتەۋدى ويىنعا اينالدىرعانداردى جۇگەندەيتىن كەز كەلدى. بۇل – ەلدىڭ قاۋىپسىزدىگى مەن تىنىشتىعى ءۇشىن قاجەت», – دەدى ماقسات تولىقباەۆ.
