دەپۋتات راديكال اعىمداردى قاتاڭ باقىلاۋدى ۇسىندى

فوتو: جەتىسۋ گازەتى

باس پروكۋرور بەرىك اسىلوۆتىڭ اتىنا مەملەكەتتىك رامىزدەردى قورلاۋعا قاتىستى دەپۋتاتتىق ساۋال جولداندى. ءماجىلىس دەپۋتاتى ەرمۇرات ءباپي قوعامدا ۇلتتىق قۇندىلىقتارعا, سالت-داستۇرلەرگە باعىتتالعان ارانداتۋشىلىق ارەكەتتەر كۇشەيىپ بارا جاتقانىن ايتتى, دەپ حابارلايدى qandastar.kz

كوك تۋعا جاسالعان قورلىق – قوعامدى ءدۇر سىلكىندىردى

جۋىردا اتىراۋدا وتكەن سپورتتىق ءىس-شارادا ءتورت ايەلدىڭ قازاقستاننىڭ مەملەكەتتىك تۋىن وزگەرتىلگەن سيمۆوليكامەن ۇستاپ تۇسكەن سۋرەتى الەۋمەتتىك جەلىلەردە كەڭ تارادى. تۋدىڭ بەتىنە ارابشا جازۋلار مەن قىلىش بەينەسى سالىنعان.

بۇل وقيعا ەل اراسىندا ۇلكەن رەزونانس تۋدىرىپ, ازاماتتاردىڭ نارازىلىعىن ءورشىتتى. دەپۋتاتتار بۇل ارەكەتتى جاي عانا ادەپسىزدىك ەمەس, ۇلتتىق رامىزدەرگە, مەملەكەتتىلىككە باعىتتالعان قاساقانا ارانداتۋشىلىق دەپ باعالاپ وتىر.

تۋ – ءاربىر قازاقستاندىق ءۇشىن قاسيەتتى قۇندىلىق. ونى بوتەن بەلگىلەرمەن بۇرمالاۋ – بۇكىل حالىقتى قورلاۋ! مۇنداي زاڭ بۇزۋشىلىققا جول بەرمەۋ كەرەك, – دەلىنگەن دەپۋتاتتىق ساۋالدا.

بۇل قىلمىستى كىم ۇيىمداستىردى?

حالىق قالاۋلىلارى تۋدى وزگەرتۋ ارەكەتى كەزدەيسوق جاسالماعانىن, ونىڭ ارنايى دايىندالعانىن اتاپ ءوتتى. تۋ ساپالى باسپا قۇرالىمەن تاڭبالانعان, بۇل جاعدايدىڭ الدىن الا جوسپارلانعانىن كورسەتەدى. سونىمەن قاتار, قاتىسۋشى ءتورت ايەلدىڭ ارانداتۋشىلاردىڭ قۇربانى بولۋى مۇمكىن ەكەنى دە ايتىلدى.

دەپۋتاتتار بۇل وقيعانىڭ استارىندا ۇيىمداسقان توپتىڭ ارەكەتى جاتقانىن جانە شىنايى كىنالىلەردى جاۋاپقا تارتۋ قاجەتتىگىن باسا ايتتى.

اكىمشىلىك جازاعا تارتىلعان ءتورت ايەلدەن بۇرىن, بۇل ارانداتۋدى ۇيىمداستىرعاندار انىقتالۋى كەرەك! بۇل – ۇلتتىق بىرەگەيلىكتى جويۋعا باعىتتالعان قاۋىپتى قادام, – دەلىنگەن مالىمدەمەدە.

جالعان تۋلار اشىق ساتىلىمدا ءجۇر

تاعى ءبىر الاڭداتارلىق ماسەلە – بۇرمالانعان مەملەكەتتىك رامىزدەردىڭ ونلاين ساۋدا پلاتفورمالارىندا ەركىن ساتىلىپ جاتقانى. Wildberries Russ ماركەتپلەيسىندە ستاندارتقا ساي كەلمەيتىن قازاقستان تۋى 5000 تەڭگەدەن ساۋدالانۋدا.

مۇنداي ارەكەتتەرگە كىم رۇقسات بەردى? بۇل قالايشا زاڭدى بولىپ وتىر? – دەپ ءباپي نارازىلىق ءبىلدىردى.

نە ىستەۋ كەرەك? دەپۋتاتتاردىڭ ۇسىنىستارى:

— قۇقىق قورعاۋ ورگاندارى بۇل ءىستى تەرەڭ زەرتتەپ, ناقتى ۇيىمداستىرۋشىلاردى انىقتاپ, جاۋاپكەرشىلىككە تارتۋى ءتيىس.

— مەملەكەتتىك ستاندارتقا ساي كەلمەيتىن تۋلاردى ساتىلىمنان الىپ تاستاپ, مۇنداي ارەكەتتەرگە جول بەرگەن ساۋدا ورىندارى جاۋاپقا تارتىلۋى كەرەك.

— ماركەتپلەيستەرگە ۇلتتىق بىرەگەيلىككە زيان كەلتىرەتىن ونىمدەردى ساتۋعا تىيىم سالاتىن زاڭنامالىق وزگەرىستەر ەنگىزۋ قاجەت.

— مەملەكەت راديكالدى اعىمداردىڭ ورەسكەل ارەكەتتەرىنە باقىلاۋدى كۇشەيتىپ, ءدىني قۇندىلىقتاردى بۇرمالاۋعا قارسى شارالاردى قاتاڭداتۋ قاجەت.

— مەكتەپتەردە ءدىنتانۋ ساباقتارىن ۇلتتىق مادەنيەت نەگىزىندە جۇرگىزۋ باعدارلاماسىن ازىرلەۋ قاجەت.

sn.kz حابارلاعانداي, ۇلتتىق قۇرىلتايدا پرەزيدەنت قاسىم-جومارت توقاەۆ قازاقى داستۇرلەر مەن كيىم ۇلگىلەرىن دارىپتەۋدى ەرەكشە اتاپ وتكەن بولاتىن. بىراق دەپۋتاتتاردىڭ ايتۋىنشا, قوعامدا ۇلتتىق مادەنيەتكە قارسى ارەكەتتەر جيىلەپ بارادى.

بۇل – ءبىزدىڭ تاريحىمىز بەن مادەنيەتىمىزدى جوققا شىعارۋ ارەكەتى ۇلتتىق بولمىسىمىزدى السىرەتىپ, قوعامدى ەكىگە بولۋگە تىرىساتىن كەز كەلگەن ارەكەتكە توسقاۋىل قويىلۋى ءتيىس, – دەپ مالىمدەدى دەپۋتات.