Depýtat radıkal aǵymdardy qatań baqylaýdy usyndy

Foto: Jetisý gazeti

Bas prokýror Berik Asylovtyń atyna memlekettik rámizderdi qorlaýǵa qatysty depýtattyq saýal joldandy. Májilis depýtaty Ermurat Bápı qoǵamda ulttyq qundylyqtarǵa, salt-dástúrlerge baǵyttalǵan arandatýshylyq áreketter kúsheıip bara jatqanyn aıtty, dep habarlaıdy qandastar.kz

Kók týǵa jasalǵan qorlyq – qoǵamdy dúr silkindirdi

Jýyrda Atyraýda ótken sporttyq is-sharada tórt áıeldiń Qazaqstannyń memlekettik týyn ózgertilgen sımvolıkamen ustap túsken sýreti áleýmettik jelilerde keń tarady. Týdyń betine arabsha jazýlar men qylysh beınesi salynǵan.

Bul oqıǵa el arasynda úlken rezonans týdyryp, azamattardyń narazylyǵyn órshitti. Depýtattar bul áreketti jaı ǵana ádepsizdik emes, ulttyq rámizderge, memlekettilikke baǵyttalǵan qasaqana arandatýshylyq dep baǵalap otyr.

Tý – árbir qazaqstandyq úshin qasıetti qundylyq. Ony bóten belgilermen burmalaý – búkil halyqty qorlaý! Mundaı zań buzýshylyqqa jol bermeý kerek, – delingen depýtattyq saýalda.

Bul qylmysty kim uıymdastyrdy?

Halyq qalaýlylary týdy ózgertý áreketi kezdeısoq jasalmaǵanyn, onyń arnaıy daıyndalǵanyn atap ótti. Tý sapaly baspa quralymen tańbalanǵan, bul jaǵdaıdyń aldyn ala josparlanǵanyn kórsetedi. Sonymen qatar, qatysýshy tórt áıeldiń arandatýshylardyń qurbany bolýy múmkin ekeni de aıtyldy.

Depýtattar bul oqıǵanyń astarynda uıymdasqan toptyń áreketi jatqanyn jáne shynaıy kinálilerdi jaýapqa tartý qajettigin basa aıtty.

Ákimshilik jazaǵa tartylǵan tórt áıelden buryn, bul arandatýdy uıymdastyrǵandar anyqtalýy kerek! Bul – ulttyq biregeılikti joıýǵa baǵyttalǵan qaýipti qadam, – delingen málimdemede.

Jalǵan týlar ashyq satylymda júr

Taǵy bir alańdatarlyq másele – burmalanǵan memlekettik rámizderdiń onlaın saýda platformalarynda erkin satylyp jatqany. Wildberries Russ marketpleısinde standartqa saı kelmeıtin Qazaqstan týy 5000 teńgeden saýdalanýda.

Mundaı áreketterge kim ruqsat berdi? Bul qalaısha zańdy bolyp otyr? – dep Bápı narazylyq bildirdi.

Ne isteý kerek? Depýtattardyń usynystary:

— Quqyq qorǵaý organdary bul isti tereń zerttep, naqty uıymdastyrýshylardy anyqtap, jaýapkershilikke tartýy tıis.

— Memlekettik standartqa saı kelmeıtin týlardy satylymnan alyp tastap, mundaı áreketterge jol bergen saýda oryndary jaýapqa tartylýy kerek.

— Marketpleısterge ulttyq biregeılikke zııan keltiretin ónimderdi satýǵa tyıym salatyn zańnamalyq ózgerister engizý qajet.

— Memleket radıkaldy aǵymdardyń óreskel áreketterine baqylaýdy kúsheıtip, dinı qundylyqtardy burmalaýǵa qarsy sharalardy qatańdatý qajet.

— Mektepterde dintaný sabaqtaryn ulttyq mádenıet negizinde júrgizý baǵdarlamasyn ázirleý qajet.

sn.kz habarlaǵandaı, Ulttyq quryltaıda Prezıdent Qasym-Jomart Toqaev qazaqy dástúrler men kıim úlgilerin dáripteýdi erekshe atap ótken bolatyn. Biraq depýtattardyń aıtýynsha, qoǵamda ulttyq mádenıetke qarsy áreketter jıilep barady.

Bul – bizdiń tarıhymyz ben mádenıetimizdi joqqa shyǵarý áreketi Ulttyq bolmysymyzdy álsiretip, qoǵamdy ekige bólýge tyrysatyn kez kelgen áreketke tosqaýyl qoıylýy tıis, – dep málimdedi depýtat.