ءبىلىم
دەپۋتات: سەمەيدەگى جايت «پەداگوگ مارتەبەسى» زاڭىنىڭ بۇزىلعانىن كورسەتەدى
فوتو: اشىق دەرەككوز
سەمەيدە جاڭاجىلدىق شىرشانى بەزەندىرگەن مۇعالىم بيىكتەن قۇلاپ, اۋرۋحاناعا ءتۇستى. بۇل جاعدايعا قاتىستى ءماجىلىس دەپۋتاتى اسحات ايماعامبەتوۆ پىكىر ءبىلدىردى, دەپ حابارلادى qandastar.kz
«سەمەي قالاسىندا مۇعالىمدەردى جاڭاجىلدىق شىرشانى ورناتۋعا تارتىپ, سونىڭ سالدارىنان ءبىر مۇعالىمىمىزدىڭ اۋىر جاراقات العانى الاڭداتتى. مۇنداي جاعدايدى جاي عانا “جاڭساقتىق” دەپ قاراستىرۋعا بولمايدى.
«پەداگوگ مارتەبەسى تۋرالى» زاڭنىڭ 6-بابىندا ناقتى كورسەتىلگەن: مۇعالىمدەردى كاسىبي مىندەتتەرىنە جاتپايتىن جۇمىستارعا تارتۋعا قاتاڭ تىيىم سالىنادى. جاڭا جىلدىق شىرشا ورناتۋ, كوشە تازالاۋ, باسقا دا ناۋقاندارعا ماجبۇرلەپ تارتۋ سياقتى ەسكى “داستۇرلەردەن” ءبىرجولا باس تارتۋىمىز كەرەك. بۇل – زاڭدى ورەسكەل بۇزۋ.
وسى وقيعا بويىنشا ناقتى شارالار قاجەت:
- وبلىس باسشىلىعى بۇل جاعدايدى مۇقيات تەرگەپ, جاۋاپتى تۇلعالاردى جازالاۋى ءتيىس.
- مۇعالىمدەرگە تىكەلەي مىندەتىنە جاتپايتىن جۇمىستارعا تارتۋدى توقتاتۋ ءۇشىن مينيسترلىك باقىلاۋدى كۇشەيتۋى قاجەت.
- ءبىلىم باسقارمالارى مەن مەكتەپ اكىمشىلىكتەرى مۇعالىمدەردىڭ قۇقىقتارىن قاتاڭ ساقتاۋ بويىنشا مىندەتتەرىن ورىنداۋى ءتيىس.
مەملەكەت باسشىسى ءاردايىم مۇعالىمدەردىڭ مارتەبەسىن قورعاۋ مەن ولاردىڭ قۇقىقتارىن ساقتاۋ ماسەلەسىن ەرەكشە نازاردا ۇستاپ كەلەدى. ءبىزدىڭ مىندەتىمىز – سول تالاپتاردى ورىنداپ, زاڭنىڭ جۇمىس ىستەۋىن قامتاماسىز ەتۋ. مينيسترلىكتىڭ بۇل ماسەلەنى باقىلاۋعا العانى – ءۇمىت بەرەدى.
جاراقات العان ارىپتەسىمىزگە تەزىرەك ساۋىعىپ كەتۋىن تىلەيمىن», – دەپ جازدى اسحات ايماعامبەتوۆ.
