دەپۋتات سەناتتى تاراتقان جاعدايدا كىم پرەزيدەنتتىككە ۇمىتكەر بولاتىنىن ايتتى

فوتو: parlam.kz

پارلامەنت كۋلۋارىندا جۋرناليستەر دەپۋتات ايدوس سارىمنان سەناتتى قىسقارتقان جاعدايدا ەلىمىزدە پرەزيدەنتتىككە ەكىنشى ۇمىتكەر كىم بولۋى مۇمكىن ەكەنىن سۇرادى, دەپ  جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

دەپۋتاتتىڭ ايتۋىنشا, قازاقستاننىڭ مەملەكەتتىك قۇرىلىمى ءبىر پالاتالى نەمەسە ەكى پالاتالى پارلامەنتكە قاراماستان, پرەزيدەنتتىك-پارلامەنتتىك رەسپۋبليكا بولىپ قالا بەرەدى. سەنات جويىلعان جاعدايدا پرەزيدەنتتىككە ءماجىلىس سپيكەرى ۇمىتكەر بولۋعا تيىس.

«پرەزيدەنت وكىلەتتىگى توقتاعان جاعدايدا ءماجىلىس سپيكەرى ەل باسشىسى بولۋى مۇمكىن. قازىر ءبىز سايلاۋ, پارتيالار تۋرالى زاڭدى جۇمىسقا قابىلداپ جاتىرمىز. مەنىڭشە, پرەزيدەنت تۋرالى زاڭدى تاعى قاراستىرۋ كەرەك.ناقتى جازىلعان ءتارتىپ بولۋعا تيىس «, – دەيدى دەپۋتات.

سارىم ەلىمىزدە پرەزيدەنت وكىلەتتىگىن بەرۋ ءتارتىبى ناقتى زاڭ جۇزىندە جازىلماعانىن ايتتى. ول فورس-ماجور جاعدايىندا بيلىكتىڭ اۋىسۋى ونداعان شەنەۋنىكە  دەيىن جازىلعان اقش-تى مىسالعا كەلتىردى.

«وندا 28-شەنەۋنىككە دەيىن جازىلعان: ەگەر سەنات سپيكەرى باس تارتسا, ەگەر كەلەسىسى باس تارتسا, ءتىپتى ۆيتسە-پرەمەرلەر مەن مينيسترلەرگە دەيىن. مەنىڭ ويىمشا, بولاشاقتا ءبىز تاريحتىڭ قانداي بولاتىنىن, جاعدايدىڭ قالاي بولاتىنىن بىلمەيمىز, سوندىقتان وسى بارلىق ءتارتىپتى بارىنشا بەلگىلەۋ ماڭىزدى.

اسكەريلەردە نەگە كوپ سۇراق تۋىندامايدى دەيسىز, سەبەبى ولاردا كونۆەرتتەر دەپ اتالاتىندار بار, سول كونۆەرت اشىلادى, وندا نە ىستەۋ كەرەكتىگى جازىلعان. ءبىز وسى ءتارتىپتى نەعۇرلىم كوپ ەسكەرسەك, كەلەشەكتە سوعۇرلىم از پروبلەما بولادى «, — دەپ مالىمدەدى ايدوس سارىم.

ايتا كەتەيىك, مەملەكەت باسشىسى قاسىم-جومارت توقاەۆ جولداۋ كەزىندە بىر پالاتالى پارلامەنت قۇرۋ تۋرالى باستاما كوتەردى.