Depýtat úı kezegindegi azamattarǵa ýaqytsha baspana berýdi usyndy

Ýákiletti organnyń aqparatyna sáıkes respýblıka boıynsha turǵyn úı kezegine 647 117 adam tur.Sonyń ishinde, Astana qalasynda – 40 myń adam, Almaty qalasynda – 43 myń adam, Túrkistan oblysynda – 62 myń adam, Aqtóbe oblysynda – 36 myń adam kezekte tur. 2024 jylǵa respýblıkalyq bıýdjetten 5090 páterdi salýǵa 69,3 mlrd teńge qarajat bólingen. Sonymen qatar 7 522 páterimen kredıttik turǵyn úıdi salýǵa 87 mlrd teńge qarastyrylǵan. Ol tek kezekte turǵan adamdar sanynyń 2% ǵana turǵyn úımen qamtamasyz etedi. “Abaı oblysynda 19373 azamat turǵyn úı kezeginde tur. Sonyń ishinde, Semeı qalasynda 14 000 adam. Semeı qalasynda azamattardy qabyldaǵanda kóptegen azamattar turǵyn úı máselesin kóterdi. Jalǵyzbasty, kópbalaly analar, múgedektigi bar jandar keldi. Kóp jyldar kezekte turǵan azamattar bar. Turǵyn úıge muqtaj azamattardyń jaǵdaıy qıyn, turaqty turatyn úıleri joq. Alǵan kredıtteri bar, turǵyn úı baǵdarlamalaryna qatysý múmkindigi joq, alǵashqy jarnany tóleı almaıdy”, – deıdi Sabılıanov. Sózinshe, qabyldaýda bolǵan azamattar kezekten úı alǵanǵa deıin ýaqytsha turatyn úı, jataqhana berýdi uıymdastyrý týraly usynys aıtqan. “Jalpy, kezekte turǵandardy turǵyn úımen qamtamasyz etýdi jaqsartý baǵytynda Parlament Májilisi tıisti zańdarǵa ózgerister engizip, jergilikti atqarýshy organdarǵa daıyn turǵyn úılerdi satyp alý quzyreti berildi. Qarajat bólinse, kezekte turǵan adamdarǵa úı alý múmkindigi artady. Sondaı-aq «Zańsyz ıemdenilgen aktıvterdi memleketke qaıtarý týraly» Zańǵa sáıkes memleketke qaıtarylǵan qarajat áleýmettik jobalarǵa, turǵyn úımen qamtamasyz etýge de jumsalýy qajet, – dep atap ótti májilismen. Depýtat mynadaı usynys jasady: respýblıkalyq bıýdjetten turǵyn úı salýǵa qosymsha qarajat bólý; zańsyz ıemdenilgen aktıvterdiń memleketke qaıtarylǵan qarajatynyń bir bóligin turǵyn úı qurylysyna jáne jańa úılerdi satyp alýǵa jumsaý; 3 jyldyq respýblıkalyq bıýdjetten jergilikti bıýdjetke sýbvenııa bergende turǵyn úı salýǵa, satyp alýǵa qajetti qarajat qarastyrýdy; turǵyn úı salýǵa baǵaly qaǵazdar shyǵarý arqyly qarajat tartý; kezekte turǵan azamattardy turǵyn úı kezegi kelgenge deıin ýaqytsha turatyn úımen qamtamasyz etý máselelerin qarastyrýdy surady.