Depýtat Ulttyq bankti Ulttyq qor aktıvteri jóninde ashyq túrde esep bermeısińder dep synady

Foto: stambekov.kz

Májilis depýtaty Erlan Stambekov Ulttyq qor aktıvterin basqarýda ashyqtyq joq ekenin aıtyp, Ulttyq bankti synady, dep jazdy qandastar.kz

Bul týraly Stan.kz aqparat agenttigi habarlaıdy.

Májiliste «Qazaqstan Ulttyq qoryndaǵy 69 mıllıard dollardyń naqty qalaı ıgerilip jatqanyn qoǵam men parlament nege áli kúnge deıin bilmeıdi?» dep suraq qoıǵan depýtat bul aqshany basqarýǵa Ulttyq bank jaýapty ekenin eske saldy.

«Ulttyq qordyń aktıvterin Ulttyq bank basqarady – bul 2024 jyldyń aıaǵynda shamamen 69 mıllıard dollar bolǵan. Alaıda jumsalym qurylymy, táýekelder men kiristilik qoǵam men parlament úshin jabyq kúıinde qalyp otyr», – dep málimdedi depýtat.

Esepterde tolyq aqparat berilmeıtinin Joǵary aýdıtorlyq palata da rastap otyr. Atap aıtqanda, qarajat qaı elderge jáne qandaı valıýtada salynǵany kórsetilmegen, stress-testter men baqylaý júıesi týraly aqparat joq.

«Norvegııalyq, sıngapýrlyq jáne Abý-Dabı qorlary sııaqty halyqaralyq qorlar tolyq ınvestıııalyq esepterdi jarııalap otyrady, al Qazaqstanda áli kúnge deıin esep berýde ashyqtyq joq, táýelsiz qadaǵalaý organy da  joq», – dedi Stambekov.

Onyń aıtýynsha, Ulttyq bank qordyń aqshasyn basqarady ári retteýshi retinde óz-ózin baqylaıdy. Depýtat munda múddeler qaqtyǵysy bolýy múmkin ekenin de alǵa tartty.

«Nege Ulttyq bank Ulttyq qordy basqarýdyń  halyqaralyq ashyqtyq standarttaryn áli kúnge deıin engizbeı otyr jáne esep berýdi qamtamasyz etetin jáne múddeler qaqtyǵysyn joıatyn syrtqy baqylaý, baqylaý keńesi nemese basqa tetik qurý josparda bar ma?», – dep surady Stambekov.

Buǵan jaýap retinde Ulttyq bank tóraǵasynyń orynbasary Erulan Jamaýbaev buǵan deıin esepter shynymen de tolyq jarııalanbaǵanyn moıyndap, bıyldan bastap bári ózgeredi dep ýáde berdi.

«Ulttyq bank bul qorǵa qatysty senimgerlik basqarýshy bolyp sanalady. Sondyqtan Ulttyq bank tarapynan jyl saıyn úkimetke búkil esep berilip otyrady. Ony qarjy mınıstrligi jınaqtap, prezıdenttiń jarlyǵymen bekitiledi. Bekitilgennen keıin mindetti túrde jarııalanaýy tıis. Degenmen sońǵy jyldary bul aqparat tolyǵymen jarııalanǵan joq, sebebi halyqaralyq arbıtrajda rezonansty ister boldy. Jaqyn arada jarlyq shyǵady, bıyldan bastap esep tolyǵymen jarııalanatyn bolady. Bul jerde siz aıtqan ınvestıııalyq kórsetkishter de, memleketter bólinisinde de jáne tabystylyqqa qatysty, valıýtaǵa qatysty búkil aqparat bolady», – dedi ol.

Jamaýbaev mundaı esepterdi Ulttyq banktiń saıtynda jáne aqparat quraldarynda únemi jarııalap turýǵa ýáde berdi. Ol, buǵan qosa, qazir de baqylaý júıesinde qor josparlarynyń oryndalýyn baqylaıtyn arnaıy keńes pen komıssııa bar ekenin atap ótti.