جاڭالىقتار
دەپۋتاتتار اۆتوتۇراقتا كولىكتىڭ تەگىن تۇرۋ ۋاقىتىن ۇزارتۋدى ۇسىندى
فوتو: اشىق دەرەككوز
رومان سكليار وسى بويىنشا دەپۋتاتتاردىڭ ۇسىنىسى زاڭ شەڭبەرىندە قارالاتىنىن ايتادى. ءبىرىنشى ۆيتسە-پرەمەر ماجىلىسمەندەرگە بەرگەن جازباشا جاۋابىندا ءۇش مەگاپوليسكە جەكە توقتالعان, دەپ جازادى qandastar.kz
«استانا اكىمدىگىنىڭ اقپاراتىنا سايكەس, اقىلى كوممۋنالدىق اۆتوتۇراقتار قالانىڭ ورتالىق اۋداندارىندا, حالىق تىعىز شوعىرلانعان جەرلەرى كولىك توراپتارىندا, ساۋدا ويىن-ساۋىق ورتالىقتارىندا, اكىمشىلىك كەشەندەردە جانە تاعى دا باسقا جەرلەردە ورنالاسقان. اقىلى كوممۋنالدىق اۆتوتۇراقتارعا ىرگەلەس ورنالاسقان ۇيلەردىڭ تۇرعىندارىنا تەگىن تۇراق قۇقىعىن بەرەتىن رەزيدەنتتىك ابونەمەنتتەر بەرىلەدى.
ال الماتى اكىمدىگىنىڭ اقپاراتىنا سايكەس, اقىلى كوممۋنالدىق اۆتوتۇراقتار قالانىڭ تاريحي ىسكەرلىك ورتالىعىندا, سونداي-اق كورىكتى جەرلەرگە جاقىن جەردە ورنالاسقان.
سونىمەن قاتار, شىمكەنت قالاسىندا جانە باسقا وبلىستاردا اۆتوتۇراق ۇيىمداستىرۋ ءتارتىبىن رەتتەيتىن نورماتيۆتىك قۇقىقتىق اكت جوق.
وسىعان وراي, قازىرگى ۋاقىتتا قازاقستان رەسپۋبليكاسىنىڭ ماجىلىسىندە قارالىپ جاتقان استانانىڭ جانە رەسپۋبليكالىق قالالاردىڭ دامۋى ماسەلەلەرى بويىنشا زاڭ جوباسى شەڭبەرىندە وبلىس, رەسپۋبليكالىق ماڭىزى بار قالالاردىڭ اكىمدەرىن اۆتوتۇراقتاردى (اۆتوموبيل قوياتىن ورىنداردى, پاركينگتەردى) ۇيىمداستىرۋ جانە ولاردىڭ ساناتتارىن ايقىنداۋ قاعيدالارىن بەكىتۋ قۇزىرەتىن بەرۋ بولىگىندە زاڭنامالىق تۇزەتۋلەر ەنگىزۋ كوزدەلگەن», – دەدى رومان سكليار.
ەسكە سالايىق, دەپۋتاتتار اۆتوتۇراقتا كولىكتىڭ تەگىن تۇرۋ ۋاقىتىن كەم دەگەندە 30 مينۋتقا دەيىن ارتتىرۋدى جانە اقىلى اۆتوتۇراقتاردى كولىكتەر ەڭ كوپ جينالاتىن ىسكەرلىك اۋدانداردا عانا قالدىرىپ, قالعانىن جويۋدى ۇسىنعان بولاتىن.
