جاڭالىقتار
دەپۋتاتتار «بايتەرەك» زىمىران كەشەنىنىڭ قۇرىلىسىمەن تانىستى
فوتو: اشىق دەرەككوز
دەپۋتاتتار «بايتەرەك» زىمىران كەشەنىنىڭ قۇرىلىسىمەن تانىستى, دەپ جازدى qandastar.kz
دەپۋتاتتار قازاقستان مەن رەسەي ۇكىمەتتەرى اراسىنداعى «بايتەرەك» عارىش زىمىران كەشەنىن قۇرۋ تۋرالى كەلىسىمگە وزگەرىستەر ەنگىزۋ جونىندەگى حاتتامانى راتيفيكاتسيالاۋ تۋرالى زاڭ جوباسىمەن جۇمىس اياسىندا «بايقوڭىر» عارىش ايلاعىنا باردى. جۇمىس توبىنىڭ كوشپەلى وتىرىسىنا ءماجىلىس دەپۋتاتتارى دۇيسەنباي تۇرعانوۆ, پاۆەل كازانتسەۆ, بولات كەرىمبەك, سەنات دەپۋتاتى گالياسقار سارىباەۆ, قر پرەزيدەنتىنىڭ «بايقوڭىر» كەشەنىندەگى ارنايى وكىلى قايرات نۇرتاي, سونداي-اق قر تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ اەروعارىش كوميتەتى مەن «بايتەرەك» قازاقستان-رەسەي بىرلەسكەن كاسىپورنى» اق-نىڭ جاۋاپتى وكىلدەرى قاتىستى.
قازاقستاندىق عارىشكەر ايدىن ايىمبەتوۆتىڭ ايتۋىنشا, بۇل كەشەن قازىرگى «زەنيت-م» عارىش زىمىران كەشەنىنىڭ ينفراقۇرىلىمى نەگىزىندە سالىنۋدا جانە ورتا كلاستى جاڭا بۋىن «سويۋز 5» زىمىران-تاسىعىشىن ۇشىرۋعا ارنالعان. دەپۋتاتتار بۇل جوبا قازاقستانعا سپۋتنيكتەردى قۇراستىرۋدان باستاپ, ولاردى ۇشىرۋ جانە ەل ەكونوميكاسىنىڭ مۇددەسىنە ساي پايدالانۋعا دەيىنگى عارىشتىق قىزمەتتىڭ تولىق تسيكلىن جۇزەگە اسىرۋعا مۇمكىندىك بەرەتىنىنە نازار اۋداردى. ودان ءارى پارلامەنت دەپۋتاتتارى «زەنيت-م» عارىش زىمىران كەشەنىندەگى قۇراستىرۋ-سىناق كەشەنى مەن ۇشىرۋ قوندىرعىسىن جاڭعىرتۋ جانە قايتا قۇرۋ بويىنشا جۇرگىزىلىپ جاتقان جۇمىستارمەن تانىستى. سونداي-اق ولار «سويۋز-2» (31-الاڭ) زىمىران تاسىعىشىنىڭ ۇشىرۋ كەشەنىن كورىپ شىقتى جانە قازاقستاننىڭ «Qazcosmos» باقىلاۋ پۋنكتىنەن «سويۋز مس-27» ترانسپورتتىق باسقارىلاتىن عارىش كەمەسىمەن بىرگە ۇشىرىلعان «سويۋز-2.1ا» زىمىران تاسىعىشىنىڭ ۇشىرىلۋىن باقىلادى.
