Depýtattar ýaqyt beldeýin ózgertýge qatysty málimdeme jasady

Búgin Májilis tóraǵasy Erlan Qoshanovtyń tóraǵalyǵymen Amanat partııasy frakııasynyń keńeıtilgen otyrysy ótti. Odan keıin depýtattar Maqsat Tolyqbaı, Rınat Zaıytov, Nurtaı Sabılıanov, Luqbek Tumashınov jáne Samat Nurtaza Qazaqstan halqyna beıneúndeý joldap, eldegi burynǵy ýaqyt beldeýin qaıtarýdy usyndy.

«О́ńirlerge, ásirese Shyǵys Qazaqstan, Pavlodar, Soltústik Qazaqstan oblysy, Abaı jáne Jetisý oblystaryna issaparlar barysynda turǵyndardyń kóptegen aryz-shaǵymdary men tilekterine baılanysty arnaıy málimdeme jasaǵymyz keledi. Áriptesterim kýá. Halyq burynǵy ýaqyt beldeýin qaıtarýdy talap etip jatyr. Bálkim bul ýaqyt beldeýi Qostanaı, Qyzylorda jáne Batys Qazaqstan úshin yńǵaıly shaǵar, biraq Shyǵys Qazaqstan úshin tıimsiz. Bizdiń Shyǵys Qazaqstanda tań túngi eki jarymda atady, adamdar sıyrlardyń móńireýinen oıanasyń, al keshki bes-altyda tas qarańǵy. Mundaı jaǵdaıda ekinshi jáne úshinshi aýysymdaǵy oqýshylar úıine qalaı qaıtady? Aýyldyq jerlerde kóshe jaryǵy joq, bul máseleni ýshyqtyrady», – dedi depýtat Maqsat Tolyqbaı.

Depýtattyń aıtýynsha, Amanat partııasy Parlamenttiń jalpy otyrysynda arnaıy tyńdaýlar ótkizedi.

«Elimizdiń jeri keń bolǵandyqtan, ýaqyt beldeýin ózgertý máselesi geografııalyq erekshelikterdi eskere otyryp, aldyn ala zerttelýi kerek edi. Bul bizdiń densaýlyǵymyzǵa qalaı áser etetinin jáne qansha energııany shamadan tys jumsaıtynymyzdy eskerýimiz kerek. Sondyqtan, búgin frakııa otyrysyn ótkizdik. Úkimet múshelerin shaqyramyz, oǵan úkimet múshelerin, ǵalymdardy, sarapshylardy shaqyramyz. Naqty usynystaryńyz bolsa, birge talqylap, úkimettiń túpkilikti sheshimine yqpal etýge tyrysamyz», – dep túıindedi májilismen.