دەپۋتاتتىڭ كۇيەۋى زورلاعان كامەلەتكە تولماعان قىز تاعى دا جۇكتى بولىپ قالعان

2023 جىلدىڭ قاراشاسىندا بۇكىل ەلدى ءدۇر سىلكىندىرگەن جاعداي ورىن العان ەدى. جاڭاتاستا اۋداندىق ءماسليحات دەپۋتاتىنىڭ كۇيەۋى 12 جاستاعى وقۋشىنى زورلاعانى بەلگىلى بولدى. قىلمىس 2022 جىلدىڭ جازىندا جاسالعان. سول جىلدىڭ قاراشاسىندا قىزدىڭ اناسى ونى جاڭاتاستاعى ينتەرناتقا ورنالاستىرعان, دەپ حابارلايدى Qandastar.kz.
بۇل تۋرالى Skifnews.kz اقپارات پورتالى جازدى.

الايدا ينتەرنات باسشىلىعى قىزدىڭ جۇكتىلىگىن جاسىرۋ ءۇشىن اناسىنا ايتپاي جاساندى تۇسىك جاساتقان.

وسىدان كەيىن بىرنەشە قىلمىستىق ءىس قوزعالىپ, التى ادام سوتتالعان. دەپۋتاتتىڭ كۇيەۋىنە 20 جىلعا باس بوستاندىعىنان ايىرۋ جازاسى كەسىلدى. كەيىن ينتەرنات ديرەكتورى ەكى جىلعا سوتتالدى. ونىڭ ورىنباسارى, مەدبيكە مەن پسيحولوگقا – ءۇش جىلدان شەكتەۋ جازاسى, ال ابورت جاساعان اكۋشەرگە – ءبىر جىلعا باس بوستاندىعىنان ايىرۋ جازاسى بەرىلدى. ولارعا جۇكتىلىكتى زاڭسىز ۇزگەنى, اۋىر قىلمىستى جاسىرعانى جانە قىلمىسقا قاتىسى بارلىعى ءۇشىن ايىپ تاعىلدى.

كەيىننەن جابىرلەنۋشى قىزدى كوپبالالى جانە تۇرمىسى تومەن وتباسىلاردىڭ بالالارىنا ارنالعان تارازداعى مەكتەپ-ينتەرناتقا اۋىستىرعان. وبلىس ورتالىعىندا بولعان سوڭ, ەرەكشە باقىلاۋدا بولادى دەگەن ءۇمىت بولدى. ءارى قوعامدا ۇلكەن رەزونانس تۋدىرعان سوڭ دا جاعداي ءجىتى قاداعالانادى دەپ سەنگەن.

بىراق جۋىردا ونىڭ قايتادان جۇكتى ەكەنى انىقتالدى…

قىز قازىر شامامەن سەگىز ايلىق جۇكتىلىكتە. بالا اكەسىنىڭ كىم ەكەنى تۋرالى اقپارات جوق. ينسايدەرلەردىڭ ايتۋىنشا, جۇكتىلىك كەزدەيسوق بولعان.

قىزدىڭ ەسەپكە الىنعانىنا قاراعاندا, ينتەرنات پەن جامبىل وبلىسىنداعى ۋاكىلەتتى ورگاندار بۇل جاعدايدان حاباردار. بىراق ونى جاسىرعىسى كەلەدى. ويتكەنى جاڭاتاستاعى ينتەرنات باسشىلىعى سياقتى جاۋاپقا تارتىلۋدان قورقۋى مۇمكىن.

تاڭعالارلىعى, ەشكىم قىزدىڭ اناسىنا سۇراق قويمايدى. ويتكەنى العاش رەت ول جازعى دەمالىستا جۇكتى بولىپ قالعان. ال قازىر جۇكتىلىكتىڭ مەرزىمىنە سۇيەنسەك, بالاعا اياعى اۋىر بولعان ءساتى – قىسقى, دالىرەك ايتقاندا, جاڭا جىلدىق كانيكۋل كەزى.