جاڭالىقتار
ديكي ارماننىڭ ادۆوكاتى قوستانايداعى تەرگەۋ يزولياتورىندا قىسىمعا ۇشىراعانىن ايتتى
فوتو: وردا.كز
قاماۋدا وتىرعان ارمان جۇماگەلديەۆتىڭ (ديكي ارمان) ادۆوكاتى ۆيكتور كريۆونوسوۆ قوستاناي قالاسىنداعى №76 تەرگەۋ يزولياتورىندا قىسىمعا ۇشىراعانىن مالىمدەدى, دەپ حابارلايدى qandastar.kz
ادۆوكاتتىڭ مالىمەتىنشە, جاقىندا ول جۇماگەلديەۆپەن كەزدەسۋگە بارعاندا, يزولياتور قىزمەتكەرلەرى ونى زاڭسىز ارەكەتتەرگە ماجبۇرلەگەن. كريۆونوسوۆ شالبارىن شەشىپ, سپورتتىق كيىممەن كىرۋگە مىندەتتەلگەن. ونىڭ سوزىنشە, بۇل ادۆوكاتتىڭ ار-نامىسى مەن كاسىبي قىزمەتىنە قول سۇعۋ دەپ باعالانادى.
“ەگەر ولار ادۆوكاتتارعا وسىلاي قاراسا, مۇندا قاماۋدا وتىرعاندارعا قالاي قارايتىنىن ەلەستەتۋدىڭ ءوزى قيىن”, – دەدى ول.
Dalanews.kz. جازعانداي, ادۆوكاتتىڭ بۇل شاعىمىنا قاتىستى قوستاناي وبلىسى بويىنشا قىلمىستىق-اتقارۋ جۇيەسى دەپارتامەنتى تۇسىنىكتەمە بەردى. ۆەدومستۆونىڭ مالىمدەۋىنشە, تەرگەۋ يزولياتورىنا كىرەتىن بارلىق كەلۋشىگە تىيىم سالىنعان زاتتاردىڭ ءوتىپ كەتۋىنە جول بەرمەۋ ءۇشىن مىندەتتى تەكسەرۋ جۇرگىزىلەدى.
“ادۆوكاتتارعا رەجيمدىك مەكەمەدە تەكسەرۋدەن ءوتۋ ءتارتىبى الدىن الا ءتۇسىندىرىلدى. قاۋىپسىزدىك شارالارى اياسىندا مەتالل ىزدەگىش قۇرال ادۆوكاتتاردىڭ بىرىنەن بەلگى بەرگەندىكتەن, وعان تولىق تەكسەرۋدەن ءوتۋ ۇسىنىلدى”, – دەپ حابارلادى قاج دەپارتامەنتى.
