Dıkıı Armannyń advokaty Qostanaıdaǵy tergeý ızolıatorynda qysymǵa ushyraǵanyn aıtty

Foto: Orda.kz

Qamaýda otyrǵan Arman Jumageldıevtiń (Dıkıı Arman) advokaty Vıktor Krıvonosov Qostanaı qalasyndaǵy №76 tergeý ızolıatorynda qysymǵa ushyraǵanyn málimdedi, dep habarlaıdy qandastar.kz

Advokattyń málimetinshe, jaqynda ol Jumageldıevpen kezdesýge barǵanda, ızolıator qyzmetkerleri ony zańsyz áreketterge májbúrlegen. Krıvonosov shalbaryn sheship, sporttyq kıimmen kirýge mindettelgen. Onyń sózinshe, bul advokattyń ar-namysy men kásibı qyzmetine qol suǵý dep baǵalanady.

“Eger olar advokattarǵa osylaı qarasa, munda qamaýda otyrǵandarǵa qalaı qaraıtynyn elestetýdiń ózi qıyn”, – dedi ol.

  Dalanews.kz. jazǵandaı,     advokattyń bul shaǵymyna qatysty Qostanaı oblysy boıynsha Qylmystyq-atqarý júıesi departamenti túsinikteme berdi. Vedomstvonyń málimdeýinshe, tergeý ızolıatoryna kiretin barlyq kelýshige tyıym salynǵan zattardyń ótip ketýine jol bermeý úshin mindetti tekserý júrgiziledi.

“Advokattarǵa rejımdik mekemede tekserýden ótý tártibi aldyn ala túsindirildi. Qaýipsizdik sharalary aıasynda metall izdegish qural advokattardyń birinen belgi bergendikten, oǵan tolyq tekserýden ótý usynyldy”, – dep habarlady QAJ departamenti.