ديماش كونتسەرتىندەگى ەرەكشە ءسات ۆيدەوعا ءتۇسىپ قالدى

ەلوردادا 13-14 كىركۇيەكتە «استانا ارەنا» ستاديونىندا قازاقستاندىق تانىمال ءانشى ديماش قۇدايبەرگەننىڭ كونتسەرتى وتكەنىن بارلىعىمىز بىلەمىز.  وعان ەلىمىزدىڭ تۇكپىر-تۇكپىرىنەن جانە شەت مەملەكەتتەردەن مىڭداعان جانكۇيەر جينالدى. كونتسەرت كەزىندە جەلى قولدانۋشىلارىنىڭ نازارىن اۋدارعان ەرەكشە ءسات ۆيدەوعا ءتۇسىپ قالعان, دەپ حابارلايدى qandastar.kz.

ۆيدەونى جاريالاعان نۇراسىل بەكتۇرعانوۆ ەسىمدى موبيلوگراف Instagram-داعى پاراقشاسىندا ءوزىنىڭ جەلىدە حيت بولىپ جاتقانىن جازعان.

ء«يا, بارلىعىڭىز كورگەندەي, بۇل جاعدايداعى وپەراتور جىگىت مەن بولامىن. ساحنانىڭ شەتىندە تۇرعانىمدى بايقاپ, ۇستاپ قالۋعا تىرىسقان ديماش قۇدايبەرگەن اعاعا راحمەت. ال موبيلوگراف, ۆيدەوگرافتار جۇمىسىمىزدا بارىنشا ساق بولايىق, – دەپ جازعان نۇراسىل بەكتۇرعانوۆ.

كادرلاردان ءانشىنىڭ كامەراعا ءتۇسىرىپ جۇرگەن وپەراتوردىڭ ساحنا شەتىندە تۇرىپ قۇلاپ بارا جاتقانىن بايقاپ قول ۇشىن سوزعانىن كورۋگە بولادى. قۇلاپ كەتەتىنىن اڭعارماعان موبيلوگراف وسى ءسات تۇسىرىلگەن ۆيدەونى جاريالاپ بىلاي دەپ جازعان: «ونىڭ انشىلىگى مەن تالانتىنا ءسوز جوق, بىراق ونىڭ ادامگەرشىلىگى ءبىر بولەك الەم».

جەلى قولدانۋشىلار ديماشتىڭ بۇل ارەكەتىنە ءسۇيسىنىپ, ۆيدەو استىنا جاقسى تىلەكتەرىن قالدىرعان. «قانداي قىراعى», «ديماشنىڭ كوزى قىراننىڭ كوزىندەي, پەرىشتە سىندى جىگىتتى وقىس جاعدايدان قۇتقاردى», – دەپ جازدى پىكىر قالدىرۋشىلار.