جاڭالىقتار
ديماش قۇدايبەرگەن قىتايدىڭ Hunan TV ارناسىنداعى جوبادا پروديۋسەر بولادى
ءانشى 2025 جىلعى قازاندا نيۋ-يورك قالاسىنىڭ Madison Square Garden ستاديونىندا جەكە كونتسەرتىن وتكىزۋدى جوسپارلاپ وتىر, دەپ حابارلايدى Qandastar.kz اقپاراتتىق پورتالى.
بەلگىلى قازاقستاندىق ءانشى ديماش قۇدايبەرگەن الماتىدا وتكەن فان-كەزدەسۋدە تىڭدارماندارىنا قۋانىشتى جاڭالىعىن ايتتى. ونەرپاز قىتايلىق Hunan TV تەلەراناسىمەن بىرلەسە جاڭا ۆوكالدىق تەلەجوبانىڭ پروديۋسەرى بولماق.
ءانشى, سونداي-اق, اتالعان جوبادا ادىلقازى القالار مۇشەسى بولاتىنىن جەتكىزدى.
«مەنىڭ الەمنىڭ تۇكپىر-تۇكپىرىندە اتىمنىڭ تانىلۋىنا العاش بولىپ سەپتىگىن تيگىزگەن I am singer ۇلكەن جوباسىن كورسەتكەن Hunan TV ارناسى كوپشىلىكتىڭ ەسىندە بولار… سول Hunan TV ارناسىمەن بىرلەسىپ جاسايتىن العاشقى پروديۋسەرلىك جۇمىسىم جارىققا شىققالى جاتىر. ول دا I am singer جوباسىنا ۇقسايدى. وسى جوبادا پروديۋسەر رەتىندەگى اياق الىسىم سىزدەردىڭ الدىلارىڭىزدا وتپەك جانە مەن ادىلقازىلار مۇشەسى بولامىن. مۋزىكا سالاسىندا اتى اڭىزعا اينالعان الەمدىك جۇلدىزدار مەن جاس انشىلەر وسكەلەڭ ۇرپاققا قولداۋ كورسەتۋ ءۇشىن جۇمىستاس بولۋعا نيەت ەتىپ وتىرمىز. قازاقتا «ارىق ايتىپ, سەمىز شىق» دەگەن ءسوز بار. سول سەبەپتى ازىرگە وسىنداي قىسقا اقپارات قانا بەرۋدى ءجون كورىپ وتىرمىن. الداعىنى بارلىعىمىز بىرگە كورەتىن بولامىز», – دەدى ديماش قۇدايبەرگەن.
