ديماش قۇدايبەرگەننىڭ قىتايداعى بايقاۋدا ايتقان ءسوزى داۋعا ۇلاستى

فوتو: magmer.ru

ءانشى ديماش قۇدايبەرگەن 26 شىلدەدە «Singer 2024» ءان بايقاۋىنىڭ اقتىق باسەكەسى كەزىندە ايتقان ءسوزى قىتايلىق كورەرمەندەر اراسىندا ۇلكەن داۋعا ۇلاستى, دەپ جازادى turkystan.kz  KAZINFORM اگەنتتىگىنە سىلتەمە جاساپ.

فينالدىق باسەكەنىڭ ەكىنشى كەزەڭىندە, ديماش كانادالىق تانىمال ءانشى فاۋزياعا سىبىرلاپ سويلەگەن ءسوزى تىكەلەي ەفيردە كورەرمەنگە ەستىلىپ قالعان.

ديماش كانادالىق انشىگە «ولاردىڭ ايتۋىنشا, سەنىڭ الدىڭدا قىتاي ءانشىسى بولۋى كەرەك (They said, It must be Chinese before you)» دەگەن. ال فاۋزيا وعان «جاقسى, ماسەلە جوق» دەپ جاۋاپ بەرگەن.

بايقاۋ قورىتىندىسى بويىنشا, فاۋزيا جەڭىمپازدار قاتارىنان كورىنە الماي, قىتايلىق ءانشى نا ين جەڭىمپاز اتانىپ, تاڭ ۆەيۆەي جانە سۋن نان ۇزدىك ۇشتىكتەن كورىندى.

وسىلايشا, قىتايلىق تەلەكورەرمەندەر جانە الەۋمەتتىك جەلى پايدالانۋشىلارى «Singer» شوۋىنىڭ شىنايىلىعىنا كۇدىكتەنىپ, جوبانى ۇيىمداستىرۋشىلارعا نارازىلىق ءبىلدىردى.

ارتىنشا, ديماش قۇدايبەرگەن weibo پاراقشاسىندا تۇسىنىكتەمە بەرىپ, فاۋزيا ونىمەن بىرگە ونەر كورسەتۋدى سۇراعانىن, ال ۇيىمداستىرۋشىلار وعان قىتاي ءانشىسى بولۋى كەرەك (Must be a Chinese singer «for» you) دەپ ايتقانىن جەتكىزدى.