ديماش قىتايلىق بلوگەرگە دومبىرا سىيلادى

قىتايلىق Li Yimei ەسىمدى تانىمال بلوگەر وتانداسىمىز, ايگىلى ونەرپاز ديماش قۇدايبەرگەنمەن قالاي تانىسقانى تۋرالى بايانداپ بەردى, دەپ حابارلايدى qandastar.kz.

ول انشىمەن ءبىر باعدارلامادا جۇمىس ىستەگەن جانە وعان ديماش دومبىرا سىيلاعان.

«بارىڭىزگە سالەم! مەنىڭ ەسىمىم — Li Yimei. مەن ديماشتى وتە جاقسى تانيمىن جانە ول قىتايدا وتە تانىمال ءانشى. ويتكەنى ديماش قىتايداعى مۋزىكالىق تەلەشوۋلار مەن باعدارلامالارعا ءجيى قاتىسادى. ول كەرەمەت ءانشى جانە ونى كوپتەگەن ادام جاقسى كورەدى», — دەيدى بلوگەر.

Li Yimei ديماش قاتىسقان, كۇزگى فەستيۆالگە ارنالعان تەلەباعدارلامانى جاساۋ قۇرمەتىنە يە بولعانىن ماقتانىشپەن جەتكىزدى.

«باعدارلاما كەزىندە ءبىز كوپ اڭگىمەلەسىپ, ءبىر-ءبىرىمىزدى جاقىنىراق تانىدىق. ول ءتىپتى ماعان قازاقتىڭ ۇلتتىق اسپابى — دومبىرانى سىيلادى.

سۇيىكتى دوسىمىز ديماش قۇدايبەرگەننىڭ ارقاسىندا مەن قازاق حالقىنىڭ مادەنيەتىمەن تانىسپىن», — دەيدى قىتايلىق بلوگەر.