دينا ءتاڭسارى قانداي قىلمىستار بويىنشا كۇدىككە ءىلىندى: باس پروكۋراتۋرا ايتىپ بەردى

فوتو: الەۋمەتتىك جەلىدەن الىندى

چەرنوگوريادا «نەمولچي.kz» قورىنىڭ باسشىسى دينا ءتاڭسارىنىڭ ۇستالۋىنا بايلانىستى باس پروكۋراتۋرا رەسمي مالىمدەمە جاسادى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

تەرگەۋ دەرەكتەرىنە سايكەس, دينا تاڭسارىگە (دينارا سمايلوۆا) قاتىستى التى قىلمىستىق ءىس قوزعالعان. وعان الاياقتىق, جەكە ومىرگە قولسۇعىلماۋشىلىقتى بۇزۋ جانە جالعان اقپارات تاراتۋ كۇدىگى تاعىلۋدا.

پوليتسيانىڭ مالىمەتىنشە, 2023 جىلدىڭ ساۋىرىندە ول الەۋمەتتىك جەلىلەردە وسكەمەن قالاسىندا قىز بالانىڭ ءوز-وزىنە قول جۇمساعانى تۋرالى جالعان اقپارات جاريالاعان.

“ول مارقۇمنىڭ وتباسىنا كوڭىل ايتىپ جازبالار جاريالادى. الايدا بۇل مالىمەتتەردىڭ جالعان ەكەنى انىقتالدى. شىن مانىندە سۋيتسيد بولماعان, كامەلەتكە تولماعانعا قاتىستى بۇزاقىلىق فاكتىسى بويىنشا قىلمىستىق ءىس سوتقا جولدانعان», – دەپ حابارلادى پروكۋراتۋرا وكىلدەرى.

سوت پروتسەسى كەزىندە ول 20 ميلليون تەڭگەدەن استام قاراجات جيناعان. الايدا سوتتا جابىرلەنۋشى تاراپ ادۆوكاتتى وزدەرى جالداعانى بەلگىلى بولدى, ال جينالعان قارجىنىڭ ءىس بويىنشا پايدالانىلماعانى انىقتالعان.

تاعى ءبىر جاعدايدا ءتاڭسارى كامەلەتكە تولماعان زورلىق-زومبىلىق قۇربانىنا كومەكتەسۋ ءۇشىن بىرنەشە ميلليون تەڭگە جيناعان. الايدا تەرگەۋ بۇل وقيعانىڭ ويدان شىعارىلعانىن مالىمدەدى. سونىمەن قاتار, قارجى قوردىڭ ەمەس, ونىڭ كۇيەۋىنىڭ جەكە كارتوچكاسىنا اۋدارىلعان.

پروكۋراتۋرا مالىمەتىنشە, «نەمولچي.kz» قورىنىڭ نەگىزىن قالاۋشى رەتىندە دينا ءتاڭسارى شەتەلدە ءجۇرىپ, جەكە قاجەتىنە دەپ قايىرىمدىلىق قارجى جيناعان. پوليتسياعا جەتى ادام شاعىم ءتۇسىرىپ, الاياقتىقتىڭ قۇربانى بولعاندارىن ايتقان.

سوت ءتاڭسارىنى سىرتتاي اسا ءىرى كولەمدەگى الاياقتىق جاسادى دەگەن كۇدىكپەن ايىپتى دەپ تانىدى جانە وعان قاماۋعا الۋ تۇرىندەگى بۇلتارتپاۋ شاراسى تاعايىندالدى.

ىشكى ىستەر مينيسترلىگى ينتەرپول جەلىسى ارقىلى سمايلوۆانىڭ چەرنوگوريادا جۇرگەنىن انىقتاپ, ەكستراديتسيا تۋرالى سول ەلدىڭ قۇزىرلى ورگاندارىنا سۇراۋ جولداعان.

«الايدا قازاقستان مەن چەرنوگوريا اراسىندا قىلمىسكەرلەردى بەرۋ جونىندە حالىقارالىق كەلىسىم بولماعاندىقتان, چەرنوگوريا تاراپى سمايلوۆانى قايتارۋدان باس تارتتى. سوت شەشىمى قابىلدانعانىنا قاراماستان, قازاقستان قۇقىق قورعاۋ ورگاندارى ونى قىلمىستىق جاۋاپكەرشىلىككە تارتۋ باعىتىندا جۇمىستارىن جالعاستىرادى», – دەلىنگەن رەسمي حابارلامادا.

ەسكە سالساق, وسىعان دەيىن «نەمولچي» قورىنىڭ باسشىسى دينا ءتاڭسارى چەرنوگوريادا ۇستالعانىن جازعانبىز. ارتىنشا ەكستراديتسياسىنا قاتىستى سوت وتىرىسى ءوتىپ, چەرنوگوريا بيلىگى دينا ءتاڭسارىنى بوساتتى. ول ءوزىنىڭ بوساتىلۋىنا قاتىستى پىكىرى ءبىلدىردى.

دينا ءتاڭسارى باستاپقىدا قانداي قۇجاتقا قول قويۋ قاجەتتىگىن تۇسىنبەگەنىن, بولىمشەدە ادۆوكاتسىز جانە اۋدارماشىسىز بولعانىن العا تارتتى. وعان قوسا, قازىرگى ۋاقىتتا ساياسي بوسقىن مارتەبەسىن الىپ جاتقانىن ايتتى.

“بۇگىن ادۆوكاتپەن 10 مينۋت سويلەسۋگە مۇمكىندىك بەرىلدى. سوت مەنىڭ تولقۇجاتىمدى الىپ قويۋ تۋرالى شەشىم شىعاردى. ەكستراديتسيا ماسەلەسى ءالى قارالعان جوق. بۇگىن سوتتا تەك بۇلتارتپاۋ شاراسى قارالدى. سوت بوسقىن مارتەبەسى بەرىلگەنشە مەنى قاماۋعا الۋ نەمەسە الماۋ ماسەلەسىن شەشتى”, – دەدى دينا ءتاڭسارى.