دينارا ءساتجان پەريزات قايراتتىڭ وتىنىشىمەن قايىرىمدىلىق كەشىن ۇيىمداستىرعانىن ايتتى

«3 جىل بۇرىن پەريزات قايرات حابارلاسىپ, استانادا قايىرىمدىلىق كەشىن وتكىزىپ بەرۋىمدى سۇرادى. سونداي-اق, مەنىڭ دۇكەنىمنەن اۋكتسيونعا قوياتىن كيىم سۇراپ, قۇربىلارىم  بايان مەن ايدانى شاقىرىپ بەرىڭىزشى دەپ ءوتىندى. كەشتىڭ باستى ماقساتى — ەلوردادا ەرەكشە بالالارعا ارنالعان وڭالتۋ ورتالىعىن سالۋعا اقشا جيناۋ بولدى. ارينە, ءبىز كەلىستىك. ايتپاقشى, كەشتە سول كەزدەگى «نۇر وتان» پارتياسىنىڭ شەنەۋنىكتەرى دە بولدى. سوندىقتان دا حالىق «ءبىز بىرگەمىز» قورىنىڭ پارتياعا قاتىسى بار دەپ قاتە توپشىلاپ وتىرعان سياقتى», — دەدى ءساتجان.

Azattyq Rýhy جازعانداي,  دينارا ءساتجان قايىرىمدىلىق كەشىنەن كەيىن پەريزاتتى كورگەن سايىن ورتالىق قاشان سالىناتىنىن سۇراپ وتىردىم دەيدى.

«بيىل ورازا كەزىندە دوسىمىز اۋىزاشارعا شاقىرىپ, سول جەردە تاعى كەزدەستىك. پەريزات استانادا  ەكى تانىمال گۇل برەندىن ساتىپ العانىن ايتتى. مەن ول بيزنەستەردىڭ نەگىزىن قالاعان ەكى ادامدى دا بىلەمىن. ءوز بيزنەسىن نولدەن باستاعان ەڭبەكقور ادامدار. سول كەزدە مەن «پەريزات, سەن مۇناي ۇڭعىماسىن تاۋىپ العان جوقسىڭ با?» دەپ ازىلدەگەن ەدىم. مەن قارجى مونيتورينگ اگەنتتىگىنىڭ قانداي مۇمكىندىكتەرگە يە ەكەنىن ءبىلىپ وتىرمىن. وليگارحتاردىڭ زاڭسىز اكتيۆتەرىن قايتارىپ جاتقان ولاردان بىردەمە جاسىرۋ مۇمكىن ەمەس دەپ ويلايمىن. ونىڭ ۇستىنە, ماسەلە 1,5 ملرد تەڭگە تۋرالى بولىپ وتىر. پەريزاتتىڭ قالاي كومەكتەسكەنىن ءبارىمىز كوردىك. سۋ تاسقىنى كەزىندە اتسالىسىپ, گازا سەكتورىنا قالاي بارعانىن دا كوردىك. مۇنىڭ بارلىعى بولعان دۇنيە. ادامداردىڭ قينالىپ جاتقانىن كورگەندە, ارينە, كومەكتەسكىڭ كەلەدى. بۇل جاقسى قاسيەت. مەنىڭ ويىمشا, ءدال قازىر پەريزاتتىڭ قورىنا اقشا اۋدارعان ادامدار قىنجىلىپ وتىر. وسى جاعدايدان كەيىن ءبارىمىز قايىرىمدىلىق قورلارىنىڭ ەسەبىن اشىق كورگىزىم كەلەدى. سەنىمدى قورلاردىڭ ءتىزىمى بولسا, جاقسى بولار ەدى», — دەپ جازدى ءساتجان جەكە پاراقشاسىنا.

ەسكە سالساق, «ءبىز بىرگەمىز» قورىنىڭ جەتەكشىسى پەريزات قايرات سۋ تاسقىنى كەزىندە 1,5 ملرد تەڭگەنى جىمقىردى دەگەن كۇدىكپەن كۇنى كەشە ۇستالعان ەدى.