Dınara Sátjan Perızat Qaırattyń ótinishimen qaıyrymdylyq keshin uıymdastyrǵanyn aıtty

«3 jyl buryn Perızat Qaırat habarlasyp, Astanada qaıyrymdylyq keshin ótkizip berýimdi surady. Sondaı-aq, meniń dúkenimnen aýkıonǵa qoıatyn kıim surap, qurbylarym  Baıan men Aıdany shaqyryp berińizshi dep ótindi. Keshtiń basty maqsaty — elordada erekshe balalarǵa arnalǵan ońaltý ortalyǵyn salýǵa aqsha jınaý boldy. Árıne, biz kelistik. Aıtpaqshy, keshte sol kezdegi «Nur Otan» partııasynyń sheneýnikteri de boldy. Sondyqtan da halyq «Biz birgemiz» qorynyń partııaǵa qatysy bar dep qate topshylap otyrǵan sııaqty», — dedi Sátjan.

Azattyq Rýhy jazǵandaı,  Dınara Sátjan qaıyrymdylyq keshinen keıin Perızatty kórgen saıyn ortalyq qashan salynatynyn surap otyrdym deıdi.

«Bıyl Oraza kezinde dosymyz aýyzasharǵa shaqyryp, sol jerde taǵy kezdestik. Perızat Astanada  eki tanymal gúl brendin satyp alǵanyn aıtty. Men ol bıznesterdiń negizin qalaǵan eki adamdy da bilemin. О́z bıznesin nólden bastaǵan eńbekqor adamdar. Sol kezde men «Perızat, sen munaı uńǵymasyn taýyp alǵan joqsyń ba?» dep ázildegen edim. Men Qarjy monıtorıng agenttiginiń qandaı múmkindikterge ıe ekenin bilip otyrmyn. Olıgarhtardyń zańsyz aktıvterin qaıtaryp jatqan olardan birdeme jasyrý múmkin emes dep oılaımyn. Onyń ústine, másele 1,5 mlrd teńge týraly bolyp otyr. Perızattyń qalaı kómekteskenin bárimiz kórdik. Sý tasqyny kezinde atsalysyp, Gaza sektoryna qalaı barǵanyn da kórdik. Munyń barlyǵy bolǵan dúnıe. Adamdardyń qınalyp jatqanyn kórgende, árıne, kómekteskiń keledi. Bul jaqsy qasıet. Meniń oıymsha, dál qazir Perızattyń qoryna aqsha aýdarǵan adamdar qynjylyp otyr. Osy jaǵdaıdan keıin bárimiz qaıyrymdylyq qorlarynyń esebin ashyq kórgizim keledi. Senimdi qorlardyń tizimi bolsa, jaqsy bolar edi», — dep jazdy Sátjan jeke paraqshasyna.

Eske salsaq, «Biz birgemiz» qorynyń jetekshisi Perızat Qaırat sý tasqyny kezinde 1,5 mlrd teńgeni jymqyrdy degen kúdikpen kúni keshe ustalǵan edi.