ديپلومدار سانى قالىپتان تىس وسكەن: انتيكور جالعان ديپلوم بەرۋ سحەماسىن اشكەرەلەدى

فوتو: اشىق دەرەككوز

سىبايلاس جەمقورلىققا قارسى قىزمەت ۋنيۆەرسيتەت تۇلەكتەرى مەن جوعارى ءبىلىم تۋرالى ديپلومدار سانىنىڭ قالىپتان تىس وسۋىنە نازار اۋداردى. اگەنتتىك تەكسەرۋ بارىسىندا جالعان ءبىلىم بەرۋ قۇجاتتارىن بەرۋ سحەماسىن انىقتادى. بۇل تۋرالى Stan.kz اقپارات اگەنتتىگى ينفورمبيۋرو باعدارلاماسىنا سىلتەمە جاساپ حابارلايدى.

سىبايلاس جەمقورلىققا قارسى قىزمەت عىلىم جانە جوعارى ءبىلىم مينيسترلىگىنىڭ ديپلوم بلانكىلەرىنىڭ اينالىمىنا جانە عىلىمي دارەجەلەر بەرۋگە بايلانىستى قىزمەتىن تەكسەردى. ناتيجەسىندە بەرىلگەنى راستالماعان 1143 ديپلوم انىقتالعان. ونىڭ مىڭنان استامى ءبىلىم, 78-ءى دەنساۋلىق ساقتاۋ سالاسىنا تيەسىلى.

“19 جوو-دا زەرتتەۋ كەزىندە دەرەكقوردا تىركەلگەن, بىراق جوو-نىڭ قۇجاتتارى مەن دەرەكقورلارىندا جوق 2733 ادام انىقتالدى”, – دەلىنگەن اگەنتتىك حابارلاماسىندا.

2021 جىلى ۋنيۆەرسيتەتتەر جوعارى ءبىلىم تۋرالى ديپلومداردى ءوز بەتىنشە دايىنداۋ جانە بەرۋ قۇقىعىنا يە بولعان ەدى. ساراپشىلار بۇل ءىستى ءساتسىز اياقتالدى دەپ وتىر. زاڭعا ەنگىزىلگەن تۇزەتۋلەر جوعارى وقۋ ورىندارى اراسىنداعى باسەكەلەستىكتى دامىتىپ, جۇمىس بەرۋشىلەرمەن بايلانىس ورناتۋى كەرەك ەدى. الايدا ولار ءىسى لاس وقۋ ورىندارىنا كارت-بلانش (ەركىن تاڭداۋ) بەردى.

“ۋنيۆەرسيتەت قىزمەتكەرلەرى جالعان قۇجاتتار مەن ديپلومدار جاساۋمەن اينالىستى. Q-كودتارىنا رۇقسات الىپ, ديپلوم ساۋداسىنىڭ بەلەڭ الۋىنا اكەلدى. ەشبىر جەردە بىرىڭعاي ستاندارت جوق”, – دەدى  زاڭ كونسۋلتانتتارى پالاتالارى قاۋىمداستىعى كەڭەسىنىڭ توراعاسى فاريد اليەۆ.

ديپلوم ساتۋ نارىعىن تسيفرلىق مەحانيزمدى ەنگىزۋ ارقىلى عانا جويۋعا بولادى. «ادىلدىك جولى» قوعامدىق بىرلەستىگىنىڭ ماماندارى ششۋچە كوللەدجىندە پيلوتتىق رەجيمدە ستۋدەنتتەردىڭ ساباققا قاتىسۋىن تسيفرلىق بيومەتريالىق باقىلاۋدى جوسپارلاپ وتىر.

“بۇل جاعدايدان شىعۋدىڭ جالعىز جولى – ستۋدەنتتەردىڭ ساباققا قاتىسۋىن تسيفرلىق بيومەتريالىق تۇرعىدان باقىلاۋعا الۋ كەرەك. باسقا ەشبىر قۇرال بىزگە بۇل سحەمانى جەڭۋگە كومەكتەسپەيدى”, – دەدى  «ادىلدىك جولى» قوعامدىق بىرلەستىگىنىڭ اتقارۋشى ديرەكتورى ديدار سماعۇلوۆ.

قازىر وقۋ ورىندارى ستۋدەنتتەردى رەترواكتيۆتى تۇردە قابىلداي الادى. ويتكەنى جۇيە بۇعان تىيىم سالمايدى جانە قۇجاتتاردى تىركەۋ فۋنكتسياسىن قاراستىرمايدى. ءبىر عانا وقۋ جىلىندا 1243 تۇلەكتىڭ جوعارى ءبىلىم تۋرالى ديپلوم العانى انىقتالدى.

ايتا كەتەيىك, بۇعان دەيىن عىلىم جانە جوعارى ءبىلىم ءمينيسترى ساياسات نۇربەك جالعان ديپلوم جاساپ ساتقاندار مەن ساتىپ العاندار قىلمىستىق جاۋاپكەرشىلىككە تارتىلاتىنىن ەسكەرتكەن ەدى.