«ديپلوممەن – اۋىلعا» دەپ شاقىرتىپ العان»: قاراعاندىلىق 23 جاستاعى قىزدى زورلادى دەگەن كۇدىكپەن اۋدان اكىمى قامالدى

فوتو: pixabay.com

قاراعاندى وبلىسى پوليتسيا دەپارتامەنتى 23 جاستاعى قىزدىڭ زورلانۋىنا قاتىستى ءىس بويىنشا تەرگەۋ ءجۇرىپ جاتىر. كۇدىكتى قاماۋعا الىندى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

«پاتريوت» ارناسىندا زارداپ شەككەن قىزدىڭ وتباسى ۇسىنعان اقپارات جاريالاندى. قاراعاندىلىق ەرلى-زايىپتىلار كۇدىكتىنىڭ وتباسىمەن دوس بولعانىن, ال قىزدارى كۇدىكتىنىڭ اكىمدىگىندە جۇمىس ىستەگەنىن ايتتى. قاراعاندىلىق ەرلى-زايىپتى قىزىن اقشاتاۋ اۋىلىنىڭ اكىمى نۇرلان سەيىلبەكوۆتى زورلادى دەپ ايىپتادى. زەينەتتەگى ىشكى ىستەر ارداگەرلەرىنىڭ ايتۋىنشا, ولار قۇزىرلى ورگاندارىندا 25 جىلدان استام قىزمەت ەتكەن. ەكس-اكىم نۇرلان سەيىلبەكوۆ ولاردىڭ وتباسىلىق دوسى بولعان. سونىمەن قاتار ول 2023 جىلدىڭ 17 قىركۇيەگىندە اقشاتاۋ اۋىلدىق وكرۋگىنىڭ اكىمى قىزمەتىنە كەلگەن.

2023 جىلى ولاردىڭ قىزى ايتولقىن ە.ا. بوكەتوۆ اتىنداعى ۋنيۆەرسيتەتتى «قوعاممەن بايلانىس» ماماندىعى بويىنشا گرانتپەن ءتامامداپ, وقۋعا ءوزى ءتۇسىپ, جاقسى ناتيجە كورسەتكەن. سول كەزدە وتباسىلىق دوسى نۇرلان سەيىلبەكوۆ قىزدارىن «ديپلوممەن – اۋىلعا» باعدارلاماسى بويىنشا جۇمىسقا شاقىرىپ, كوتەرمە اقى مەن قىزمەتتىك ءۇي بەرىلەتىنىن ۋادە ەتكەن. اتا-اناسى كەلىسكەن سوڭ, قىزدىڭ كانديداتۋراسى شەت اۋدانىنىڭ اكىمدىگىندە ماقۇلدانعان. ولار قىزدارىنا اقشاتاۋ اۋىلىنان ءۇي جالداپ بەرگەن. قىزى دەمالىس كۇندەرى ءوز كولىگىمەن اتا-اناسىنا كەلىپ تۇرعان.

2024 جىلدىڭ اقپان ايىندا ايتولقىن ۇيگە كەلىپ, اناسىنا جۇكتى ەكەنىن ايتقان. قىز اناسىن بولاشاق جارىمەن تانىستىرىپ, بۇل جايلى اكەسىنە قالاي جەتكىزۋدى بىلمەي, وتباسىلىق دوستارى نۇرلان سەيىلبەكوۆتىڭ جەتكىزۋىن قالاعان. وسى ۋاقىتتا  ەكس-اكىم بۇل جاڭالىقتى جىلى قابىلداپ, الداعى تويعا جىلقى سىيلايتىنىن ايتىپ, جىگىتپەن تانىسقان.

الايدا كوپ ۇزاماي اكىم قىزدىڭ اناسىنا بولاشاق كۇيەۋ جىگىت جايلى تەرىس اقپارات جەتكىزگەن. جىگىتتى ول قىلمىستىق جاۋاپكەرشىلىككە تارتىلعان, قارىزدارى بار ەكەن دەپ ايتقان. قىزدىڭ اناسى سول كەزدە اكىمگە جىگىتتىڭ كىم ەكەنىن ايتىپ بەرگەنى ءۇشىن العىسىن دا ايتقان. اناسىنا قىزى «تويدى توقتاتىڭدار, تۇرمىسقا شىقپايمىن» دەپ ايتقان. ايەلدىڭ سوزىنشە, قىزى بۇدان كەيىن قاتتى كۇيزەلىسكە ءتۇسىپ, ىشىنەن قان كەتكەن.

«دارىگەرلەر جۇيكە جۇيەسىنىڭ كۇيزەلىسىنەن اعزادا اقاۋ بولعانىن ايتىپ, تۇسىك جاساتۋ كەرەك دەدى. مايقۇدىق اۋرۋحاناسىندا وعان 10 اپتالىق جۇكتىلىك كەزىندە تۇسىك جاسالدى. 3 مامىر كۇنى قىزىم اقشاتاۋ اۋىلىندا جۇرگەندە كەلىنىم حابارلاستى. ول “ايتولكىندى اۋىل اكىمى ساباپ تاستادى” دەدى. سويتسە قىزىم اعاسىنا حابارلاسىپ, كومەك سۇراپتى. بارلىعىن باۋىرلارىنا ايتىپ بەرگەن ەكەن. اكىممەن قارىم-قاتىناس قالاي باستالعانىن دا تولىق بايانداپتى. 2024 جىلدىڭ قاڭتارىندا اۋىلعا ىسساپارمەن ەر ادامدار كەلىپ, ۇيدەن بولمە جالداعان. سول كەزدە اكىم قىزىما “قوناقتار تۇندە بولمەڭە كىرىپ كەتسە شە, سەنىڭ جانىڭدا بولايىن” دەپ ۇسىنادى. قىزىم سەنىپ, كەلىسىپ قويىپتى. بىراق تۇندە اكىم ونى زورلاعان. تاڭەرتەڭ كەشىرىم سۇراپ, ەشكىمگە ايتپا دەپ جالىنىپتى. سول كۇننەن باستاپ اكىم قىزىمدى ءجيى مازالاي باستايدى. قىزىم زومبي سياقتى ءجۇردى. ول وسىلايشا ءبىزدىڭ قىزىمىزدى پايدالانىپ ءجۇرىپتى», – دەدى اتا-اناسى.

اتا-اناسىنىڭ ايتۋىنشا, ايتولكىن ۇنەمى بانككە بارىپ, نەسيە الىپ وتىرعان. سمارت-ساعاتتى دا نەسيەگە العان.

«قىزىم ءتىپتى اكىمدىككە تيەسىلى “نيۆا” كولىگىنە شينا ساتىپ العان. تەلەفون مەن سمارت-ساعاتتى دا سوعان ساتىپ بەرگەن. قىزىمنىڭ جالاقىسى از بولعاندىقتان, ءوزىم بانككە 1 ميلليون 600 مىڭ تەڭگە تولەدىم. ول سمارت-ساعاتتى اكىم ءوزى تاعىپ ءجۇر. قاراعاندىعا كەلگەندە ونىڭ قولىنان سول ساعاتتى ءوز كوزىممەن كوردىم», – دەدى قىزدىڭ اكەسى.

اتا-اناسىنىڭ ايتۋىنشا, پوليتسيا اۋىل اكىمىنىڭ ىسىنە نەمقۇرايلى قاراپ وتىر.

ء«بىز بۇرىن پوليتسيادا جۇمىس ىستەگەنبىز, تاجىريبەمىز بار. قۇقىق قورعاۋ ورگاندارىنىڭ قالاي جۇمىس ىستەۋ كەرەك ەكەنىن بىلەمىز. پوليتسيا ءىستى سوزىپ, اكىمگە ءبارىن “رەتتەپ” الۋعا ۋاقىت بەردى. زورلاۋ ءىسى بويىنشا ارىزدى ايەل تەرگەۋشى قابىلداۋى كەرەك. الايدا اۋداندىق پوليتسيا بولىمىندە ايەل تەرگەۋشى جوق دەپ ايتىلدى. قىزىمدى ەر ادامدار تەرگەدى. ول ءۇش رەت جىلاپ شىقتى. ءبولىم باسشىسى اسەت قۇرمانعاليەۆ جوق دەپ, پوليتسيا باسشىسىمەن جولىقتىرمادى. قىزىمدى ۇرىپ-سوعۋ تاڭعى 06:00-دا بولدى. ال اكىمدى پوليتسيا بولىمىنە كەشكى 18:00-دە قاراڭعى تۇسكەندە الىپ كەلدى. مىنە, “جەدەلدىك”! اكىم قولىنا كىسەن سالىنباستان, كۇدىكتى ەمەس, جاي قوناق سياقتى دالىزدە ءجۇردى», – دەدى اتا-اناسى.

پوليتسيا مالىمەتىنشە, شەت اۋدانىندا تۇراتىن 23 جاستاعى قىزدىڭ ارىزى نەگىزىندە قىلمىستىق ءىس قوزعالعان.

«سول كۇنى كۇدىكتى پوليتسيا تاراپىنان ۇستالىپ, ۋاقىتشا ۇستاۋ يزولياتورىنا قامالدى. سوتتىڭ سانكتسياسىمەن وعان ۇيقاماق تۇرىندەگى بۇلتارتپاۋ شاراسى قولدانىلعان», – دەلىنگەن پوليتسيا دەپارتامەنتىنىڭ حابارلاماسىندا.

پروكۋراتۋرا سوت القاسىنا جەكە اپەللياتسيالىق ءوتىنىش تۇسىرگەن. ارىز-شاعىمنان كەيىن ۇيقاماق بۇلتارتپاۋ شاراسى وزگەرتىلىپ, كۇدىكتى قاماۋعا الىنعان. قازىر تەرگەۋ امالدارى جۇرگىزىلىپ جاتىر. تەرگەۋ مۇددەسىنە بايلانىستى وزگە اقپارات جاريا ەتىلمەيدى. جەلىدە كۇدىكتىنىڭ اۋداندىق اكىمدىكتىڭ قىزمەتكەرى, ناقتىراق ايتقاندا اۋىل اكىمى ەكەنى تۋرالى اقپارات تارادى. بۇل جاعدايعا شەت اۋدانى اكىمدىگىنەن تۇسىنىكتەمە بەرىلدى.

«قىلمىستىق ءىس قوزعالعان ساتتە ول اۋىل اكىمى لاۋازىمىن اتقارماعان. بۇل ءىس جەكە سيپاتقا يە», – دەدى شەت اۋداندىق اكىمدىگى.