جاڭالىقتار
ديزەلدى ءليترىن 100 تەڭگەدەن ساتامىن: جالعان جارناما بەرگەن كۇدىكتى ۇستالدى
اتىراۋلىق تۇرعىن 2 توننا ديزەلدىڭ ءليترىن 100 تەڭگەدەن ساتامىن دەپ جالعان جارناما بەرگەن. كۇدىكتىگە قاتىستى الاياقتىق بابىمەن قىلمىستىق ءىس قوزعالدى.
اتىراۋ وبلىستىق پوليتسيا دەپارتامەنتىنىڭ ءباسپاسوز قىزمەتىنەن ءمالىم ەتكەندەي, كۇدىكتى WhatsApp مەسسەندجەرىندەگى چاتتا حابارلاندىرۋ جاريالاعان.
«توتەنشە جاعدايعا بايلانىستى WhatsApp مەسسەندجەرىندە اشىلعان چاتتاردىڭ بىرىندە ەر ادام 2 توننا ديزەلدىك وتىننىڭ ءليترىن 100 تەڭگەدەن ساتاتىنى جونىندە جارناما جاساعان. اتىراۋ قالاسىنىڭ 43 جاستاعى تۇرعىنى سۋ تاسقىنىنا بوگەت سالۋ جۇمىستارىنا توپىراق تاسيتىن كاماز جۇك كولىگىنە قۇيۋ ءۇشىن ساتىپ الۋعا كەلىسىپ, كۇدىكتىگە 100 مىڭ تەڭگە كولەمىندە اقشا اۋدارعان. كەيىن الدانعانىن ءبىلىپ, پوليتسياعا ارىزداندى», — دەپ حابارلادى دەپارتامەنتتىڭ ءباسپاسوز قىزمەتى.
وسى دەرەككە بايلانىستى پوليتسيا دەپارتامەنتى كيبەر قىلمىسقا قارسى كۇرەس توبىنىڭ قىزمەتكەرلەرى جەدەل ىزدەستىرۋ ءىس-شاراسىن جۇرگىزدى. الاياقتىق ارەكەتىنە بارعان 33 جاستاعى كۇدىكتىنى ۇستادى.
«قازىر كۇدىكتى ءوز كىناسىن تولىق مويىندادى. كۇدىكتىگە قاتىستى «الاياقتىق» بابىمەن قىلمىستىق ءىس قوزعالىپ, تەرگەۋ امالدارى جۇرگىزىلىپ جاتىر», — دەپ ءمالىم ەتتى دەپارتامەنتتىڭ ءباسپاسوز قىزمەتىنەن.
