«دوللارلاپ لاقتىردى… »: «ديكي ارماندى» تانىماي كەتكەن جۇلدىزداردىڭ قاتارىندا كىم بار

فوتو: اشىق دەرەككوز

بۇگىن «ديكي ارمان» لاقاپ اتىمەن تانىمال ارمان جۇماگەلديەۆكە قاتىستى كوپكە سوزىلعان سوت ۇكىمى شىقتى. 20 جىلعا باس بوستاندىعىنان ايىرۋعا جازا كەسىلگەن قىلمىس الەمىنىڭ سەركەسى كەزىندە ءبىراز سپورتشى مەن ءانشى-جىرشىلارعا دەمەۋشىلىك جاساعان. ءتىپتى, ونىڭ جەلىدە اقشا شاشىپ, كوپتى كوكقاعازدىڭ استىندا قالدىرعانى ەل اراسىنا اڭىزداي تاراعان ەدى, دەپ جازادى qandastar.kz nege.kz-كە سىلتەمە جاساپ. 

ءبىر كەزدەرى ارمانعا شەكسىز العىس بىلدىرگەندەردىڭ العى قاتارىندا ءداستۇرلى ءانشى ناركەنجە سەرىكباەۆا بولدى.

«مەنىڭ ءومىرىم» باعدارلاماسىنان سكرينشوت

«ءبارى كوردى عوي YouTube-تان دوللار لاقتىرىپ جاتقانىن, سول تۇسكەنىنە اۋەلى كەلدىم دە, وسىننان ءۇي̆ الدىم. قازىر 8 بولمەلى ءۇيىم بار, اللاعا شۇكىر. ودان كەي̆ىن دۋباي̆عا باردىق. ول كىسىنىڭ تاعى دا بەرگەن سىيلىعىنا ءۇي̆ىمنىڭ ءىشىن تولتىردىم. كادىمگى ءتۇزۋ جولداعى, قازاق دەپ جانى اشيتىن ەر ازاماتتىڭ ءبىرى, كادىمگى قازاقتىڭ باتىرى», ― دەگەن ەدى سەرىكباەۆا.

ءبىر قىزىعى, كەزىندە وسىلاي دەگەن ءداستۇرلى انشىگە شىعىپ, ارمانعا قانشالىقتى جاناشىرلىق تانىتاتىنىن سۇراعانىمىزدا: «مەن ورگاندا جۇمىس ىستەمەيمىن. كەزىندە ءبارى ايتقاندا مەن دە ول جايىندا ويىمدى ءبىلدىرىپ قويعام. ەشتەڭە بەرە المايدى ەكەم», – دەپ پىكىر بىلدىرۋدەن ءۇزىلدى-كەسىلدى باس تارتتى.

اقپارعا بەرىك عالامتوردى اقتارىستىرساق ارمان جۇماگەلديەۆتىڭ شوۋ-بيزنەستە دينارا قىرىقباەۆامەن دە ەتەنە ارالاسقانىن اڭعارۋعا بولادى. ماسەلەن, ولاردىڭ تۇركيادا, دۋبايدا تۇسكەن سۋرەتتەرى جاريا بولعاندا, كوپشىلىك ەكەۋىن كوڭىل قوستى دەپ توپشىلاعان.

Instagram.com/ Kyrykbayeva

بۇدان سوڭ ءانشى جەلىدەگى پاراقشاسىندا «مەن ءۇشىن ارمان تەك جاقىن اعام. اعام دەپ قانا سىيلايمىن. ارالاسامىن, قۇرمەتتەيمىن. باسقا اڭگىمە ايتۋدىڭ كەرەگى جوق. ونداي جەكە ماسەلەدە ارتىق اڭگىمە ايتپاساڭىزدار ەكەن», – دەدى. جاقىن اعاسى جالى نە ايتادى دەگەن ويمەن قىرىقباەۆاعا دا حابارلاسىپ كوردىك, الايدا تەلەفونى ءسوندىرۋلى بولدى. ال جەلىدەگى پاراقشاسىنا كەزىندە اعام دەپ وزەۋرەگەن ارمانعا قاتىستى ويىن جاريا ەتە قويمادى.

جۇماگەلديەۆ جالعاندى جالپاعىنان باسىپ تۇرعاندا الدىندا اسەم ءان شىرقاعاندار قاتارىندا ءداستۇرلى ءانشى قازىبەك ادىكەي دە بار. 2021 جىلى يۋتۋبتا تاراعان ءبىر بەينەجازبادان جۇماگەلديەۆتىڭ انشىدەن قىتايداعى قيىن جاعدايدى وتكەرىپ جاتقان قانداستارعا ارناپ ءبىر ءان ورىنداۋىن سۇراعانىن كورۋگە بولادى. ءوتىنىشتى جەردە قالدىرماعان ونەر يەسى اسحات كاۋكەر ۇلىنىڭ سوزىنە جازىلعان «جەتكىزشى ءبىر حابارىن» ءانىن ناقىشىندا ورىندايدى.

ق.ادىكەيدىڭ ينستاگرام پاراقشاسىنان

سوڭىرسىن ادىكەي «31»-ءشى ارنانىڭ «جۇلدىزدار جارقىرايدى» باعدارلاماسىندا ءوزىن اتىشۋلى «جابايى ارمانمەن» نە بايلانىستىراتىنىن ايتقان. «شاقىرعان جەردەن قالما دەيدى. كىم شاقىرسا دا ونەر ادامىنىڭ ءبارى بارادى عوي. قۋانا-قۋانا بارادى-اۋ», – دەپ شىنىن اقتاردى. وسىلاي دەگەن قازىبەك ادىكەي دە جۇماگەلديەۆ جايلى جەكە پاراقشاسىندا جاناشىرلىق تانىتا قويمادى. ال ۇيالى تەلەفونىنا شىققانىمىزدا, تۇتقانى كوتەرمەدى.

تۇركيادا تۇرىپ جاتقان اينۇر تۇرسىنباەۆانىڭ دۇركىرەتە جاساعان تويىندا جۇماگەلديەۆپەن داستارحانداس بولعان ونەرپازدار اراسىندا بالعىنبەك يماشەۆتىڭ دا بولعانى انىق. بۇعان عالامتوردا تارالعان بەينەجازبالار دالەل. ماسەلەن, ونىڭ الدىندا «بودان بولىپ ارمانى ولگەن قازاعىمنىڭ, ارمانىن ءتىرىلتتى عوي – ارمان باتىر» دەپ ارناۋ ايتقان يماشەۆ كەيىن ونى «تانىمايمىن» دەپ تانىپ شىقتى.

ۆيدەودان سكرينشوت

TALK LIKE باعدارلاماسىندا: «مەن ونى تانىمايمىن, ونداي جىگىت بار ەكەنىن بىلمەيدى ەكەنمىن. تۇركياعا اينۇر تۇرسىنباەۆاعا بارعانبىز. اينۇر تۇساۋكەسەرگە, ودان قالدى شۇجىق شىعارعاندا شاقىردى. ويتكەنى اينۇردىڭ كۇيەۋى سول ارماننىڭ جولداس جىگىتى ەكەن. سونداي ءبىر ءىس-شارالاردا كەزدەسىپ قالعانىم بولماسا, «ارمانعا باردى» دەگەن اڭگىمە شىندىققا جاناسپايدى» دەدى.

ءيا, «جابايى ارمان» اتاعى اسپانداپ تۇرعاندا ءوزى شىڭدالعان سپورت سالاسىنداعى ازاماتتاردى اينالىپ وتپەدى. مىسالى, باقتيار ارتاەۆ قازاقستان بوكس فەدەراتسياسىنىڭ ۆيتسە-پرەزيدەنتى جانە مەملەكەتتىك باپكەر قىزمەتىندە تۇرعان شاعىندا بەلگرادتا وتكەن الەم چەمپيوناتىنىڭ جارتىلاي فينالىنا وتە الماي قالعان وتاندىق سپورتشىلارعا قولداۋ ەسەبىندە ەكى مىڭ دوللاردان ۇلەستىردى. البەتتە مۇنىڭ سوڭى شۋعا اينالدى. ءبىر توپ ونىڭ ارەكەتىنە سۇيسىنسە, ەندى بىرەۋلەر كريمينالدىق اۆتوريتەتتىڭ دەمەۋشىلىگىنە قارسىلىق تانىتتى. بۇدان سوڭ جۇماگەلديەۆ پەن ارتاەۆ بىرلەسە ۆيدەو مالىمدەمە جاساعان.

ۆيدەودان سكرين

ارماننىڭ ارەكەتىن ازاماتىققا بالاعان ارتاەۆ بەينەجازبادا: «كىم قاي جاقتا جۇرمەسىن, ءبىر ەلدىڭ مۇددەسى ءۇشىن ارەكەت ەتىپ جاتىرمىز. بۇل – ارمان, بۇل– باقتير دەپ بولۋگە بولمايدى. ءبارىمىز ءبىر ەلدىڭ بالاسىمىز» دەپ اعىنان جارىلعان ەدى. كەيىن قاڭتار وقيعاسىنان سوڭ «ديكي ارمان» قولعا تۇسكەندە ارتاەۆ جولداسىن قولداي پوست تا جازدى. سپورتشى «باۋىرى ءۇشىن جۇرەگى اۋىراتىنىن» ايتىپ, ونى بوساتۋدى سۇراعان.

كەيىن ارتاەۆتىڭ وسى «ازاماتتىعى» ءوزىنىڭ باسىنا تاس بولىپ ءتيىپ, قىزمەتىنەن شەتتەلۋگە الىپ كەلدى. مۇنى راستاعان ول «ۋاقىت كورسەتەدى» YouTube-ارناسىندا: «كىم كىممەن ارالاسپاي جاتىر? تازا اقىماقتىق. اشىعىن ايتايىق, تۇنگى ساعات 2-دە قورقور شەگىپ وتىرىپ, سول كەزدەگى سپورت كوميتەتىنىڭ باسشىسى حابارلاستى. «ديكي ارمانمەن» ارالاسادى ەكەنسىڭ, جۇمىستى بوساتۋىڭ كەرەك» دەدى», – دەپ بار شىندىقتى جايىپ سالعانى بار.

جۇماگەلديەۆتى قولدايمىن دەپ جۇمساق ورىنىنان ايىرىلعان ارتاەۆقا بۇل جولى ءبىز دە شىعىپ كوردىك. بىراق بۇعان دەيىن باسىنان وتكەرگەندەرى جۇرەگىنە ءتيدى مە, باقتيار دا پىكىر بىلدىرۋدەن باس تارتتى.

بۇل «جابايى ارماننىڭ» جالعاندى جالپاعىنان باسىپ جۇرگەندە جانىنان تابىلعانداردىڭ ءبىر پاراسى عانا. بىراق قارا باسىنا كۇن تۋعاندا ارتاەۆتاي اراشا تۇسكەندەردى كورە المادىق. وسى ورايدا جامبىلدا وتكەن الامان ايتىستا بەلگىلى ايتىسكەر اقىن قاينار الاگوزوۆتىڭ ايتقانى ەرىكسىز ەسكە ورالادى.

«… مەن ول ءۇشىن بىرەۋمىن ءبىر جاقتاعى,

بىراق مەنىڭ جۇرەگىم شىن جاقتادى.

كەزىندە تالاي ءانشى ءانىن ارناپ,

تالاي اقىن الدىندا جىر جاتتادى.

قاسىنا كوك شىبىنداي ۇيىلگەندەر,

باسىنا كۇن تۋعاندا كىم جاقتادى?!

قۇلان ايعىر قۇدىققا قۇلاپ ەدى,

قۇرباقا قۇلاعىندا قىلجاقتادى…».