«دوشيراك» برەندىمەن ساتىلعان جالعان ونىمدەردىڭ ءىرى پارتياسى تاركىلەندى

2025 جىلدىڭ ماۋسىم ايىندا شىمكەنت قالاسىنداعى قويمالاردىڭ بىرىنەن كونترافاكتىلىك “دوشيراك” ونىمدەرىنىڭ 26 مىڭنان استام داناسى انىقتالىپ, تاركىلەندى. بۇل تۋرالى شىمكەنت قالاسى ادىلەت دەپارتامەنتىنىڭ ءبولىم باستىعى مۇحتار ابدەزوۆ مالىمدەدى, دەپ حابارلايدى Qandastar.kz اقپارات پورتالى Otyrar.kz-كە سىلتەمە جاساپ.

قۇقىق يەسىنىڭ رۇقساتىنسىز پايدالانىلعان «دوشيراك» تاۋار بەلگىسى بەينەلەنگەن 26 112 كونترافاكتىلىك ءونىم تاركىلەندى. الىنعان ءونىمنىڭ جالپى سوماسى 7 311 000 تەڭگەنى قۇرايدى, — دەدى ول.

كونترافاكت ونىمدەر تانىس قاپتامادا بولعانىمەن, ىشكى قۇرامى بەلگىسىز. قاپتامادا تۇپنۇسقادان بىرنەشە ايىرماشىلىقتار انىقتالعان:

جالعان ءونىمنىڭ ءماتىنى قىسقا, ال تۇپنۇسقادا تولىق ءارى كەڭ كولەمدە جازىلعان;

كونترافاكتىدەگى شانىشقىلار ساپاسىز, پوليەتيلەن پاكەتى دۇرىس تاڭبالانباعان;

كەسپەنىڭ ساپاسى مەن تۇسىندە دە ايىرماشىلىق بار.

قۇقىق قورعاۋ ورگاندارى بۇل ارەكەتتەردى «تاۋار بەلگىلەرى تۋرالى زاڭدى» جانە قر اكىمشىلىك قۇقىق بۇزۋشىلىق تۋرالى كودەكستىڭ 158-بابىن بۇزۋ رەتىندە سارالادى. اتالعان فاكتى بويىنشا اكىمشىلىك ءىس قوزعالىپ, ماتەريالدار سوتقا جولداندى.

سوت شەشىمىمەن جالعان ونىمدەر جويىلۋى مۇمكىن, ال كىنالى تۇلعالارعا ايىپپۇل سالىنادى.