«دوسى ەكەۋى زورلادى»: تانىمال سپورتشىنىڭ ۇيىندە قۇلدىقتا بولعان جىگىت سۇمدىق جايتپەن ءبولىستى

فوتو: ۆيدەودان سكرين

23 جاستاعى مۇقان نەعماتوۆ ايەلدەر كۇرەسىنەن ازيا چەمپيوناتىنىڭ جۇلدەگەرى ايشا ءۋاليحاننىڭ كۇيەۋى ءوزىن قۇلدىقتا ۇستاپ, ءتۇرلى قورلىق كورسەتكەنىن ايتتى. جاس جىگىت جانايقايىن    STAN.KZ YouTube ارناسىنا بەرگەن سۇحباتىندا جەتكىزگەن, – دەپ جازادى qandastar.kz

مۇقاننىڭ سوزىنە قاراعاندا, ءالفارابي ەسىمدى جىگىت پەن ونىڭ ايشا ەسىمدى ايەلى ءوزىن الداپ شاقىرىپ, ۇيىندە قۇلدىقتا ۇستاعان. ول مۇنداي قورلىق 10 اي 17 كۇنگە سوزىلعانىن العا تارتتى. بۇل ارالىقتا اقىسىن بەرمەك تۇگىلى, ۇرىپ-سوعىپ, زورلىق ارەكەتتەرىن دە كورسەتكەن. ەندى جابىرلەنۋشىنىڭ اناسى حالىق پەن قۇقىق قورعاۋ ورگاندارىنان كومەك سۇرايدى.

«بالامدى العاش كورگەندە شوشىپ كەتتىم. ونىڭ قۇلاعى جىرتىلعان. «نەگە ايتپادىڭ?» دەسەم, «تەلەفون شالعاندا قاسىمدا بىرەۋى نە پىشاق, نە ارماتۋرا ۇستاپ تۇرادى. باسقا ءسوز ايتقىزبايدى» دەپ جاۋاپ قاتتى.

قورلىق كورگەن جىگىتتىڭ ءوزى الفارابيمەن تانىسقانىنا بىرنەشە جىل بولعانىن, ءتىپتى ءبىر كەزدەرى بىرگە پاتەر جالداپ تۇرعانىن ايتتى.

«مەن قۇلدىقتا بولعان جەر – سولتۇستىك قازاقستان وبلىسىنىڭ ءۋاليحانوۆ اۋدانىنا قاراستى جاسقايرات اۋىلى. 2021 جىلى ايالدامادا تانىستىق, ءبىر اپتاداي بىرگە پاتەر جالداپ تۇردىق. سوسىن ولار اۋىلىنا كەتتى دە مەن الماتىعا كەتتىم. بىراق تەلەفون ارقىلى حابارلاسىپ تۇردىق. 2023 جىلى اۋەجايدا جۇمىس ىستەپ جۇرگەنمىن. ول مەنى «جۇمىس بار, 500-600 مىڭ تەڭگە تولەيمىن, كەلەمىن دەسەڭ, جولىڭا بيلەت الىپ بەرەيىن» دەدى. نەگىزى تۇركياعا كەتۋگە قۇجات جيناپ جۇرگەنمىن. 28 قىركۇيەك كۇنى الماتىدان استاناعا كەلدىم. ءسويتىپ ءارى قاراي اۋىلعا كەتتىك, بىراق ناقتى ولاردىڭ اۋىلىنا باراتىنىمىزدى دا بىلگەن جوقپىن. ءشوپ شاباتىنىمىزدى, مەنىڭ الفارابيگە كومەكتەسەتىنىمدى ايتقان. ءبىر اپتاداي ءبارى جاقسى بولدى, بىراق جۇمىسقا كىرىسە المادىق. مەن ودان جۇمىستى قاشان باستايتىنىمىزدى سۇرادىم. ءبىر كۇنى دوسىمەن بىرگە ءىشىپ كەلىپ: «يۋجان, ەجيك, كەتە المايسىڭ, كەتەتىن بولساڭ, كەتۋشى ەدىڭ» دەپ ءتيىستى», — دەدى جاس جىگىت.

ونىڭ سوزىنشە, وسى جايتتان سوڭ ول قاشىپ كەتكەن. بىراق اينالانىڭ ءبارى سۋ بولعاندىقتان, الىسقا كەتە الماپتى. كوپ ۇزاماي الگىلەر ارتىن قۋىپ جەتىپ, ونى ۇرىپ-سوعىپ, ءتىپتى ءوزىنىڭ قارىز العانى, ەندى ونى قايتارۋ كەرەكتىگى جايلى قولحات جازدىرىپ العان. مۇنىمەن قويماي, ۆيدەودا دا ءوز ەركىمەن كەلگەنى تۋرالى ايتقىزعان.

وسىلايشا, ون اي بويى ول ءوزىن قۇلدىقتا ۇستاعان وتباسىنىڭ مالىن باعىپ, ءشوبىن جايعاستىرىپ, باسقا دا ۇساق-تۇيەك شارۋاسىن اتقارىپ كەلگەن. ال ونىڭ جۇمىسى ۇناماي قالسا, قولىنا تۇسكەن زاتپەن ۇرادى ەكەن.

«اكەسى دە ايىرمەن, كۇرەكپەن ۇردى. قىستا دوسى تولقىن ەكەۋى ءىشىپ كەلىپ, زورلىق ارەكەتتەرىن كورسەتتى. ءتىپتى قولىن شالبارىما سالدى. ۇيدەگىلەردەن ەكى رەت اقشا الدىرتتى. ياعني مەنىڭ بۇيرەگىمە وپەراتسيا جاساپ جاتىر دەپ حابارلاستى. ايەلى مەدبيكە سەكىلدى حابارلاستى», — دەيدى ول.

قازىر بۇل وقيعانىڭ ءمان-جايى انىقتالىپ جاتىر.