«Dosy ekeýi zorlady»: Tanymal sportshynyń úıinde quldyqta bolǵan jigit sumdyq jaıtpen bólisti

Foto: vıdeodan skrın

23 jastaǵy Muqan Neǵmatov áıelder kúresinen Azııa chempıonatynyń júldegeri Aısha Ýálıhannyń kúıeýi ózin quldyqta ustap, túrli qorlyq kórsetkenin aıtty. Jas jigit janaıqaıyn    STAN.KZ YouTube arnasyna bergen suhbatynda jetkizgen, – dep jazady qandastar.kz

Muqannyń sózine qaraǵanda, Álfarabı esimdi jigit pen onyń Aısha esimdi áıeli ózin aldap shaqyryp, úıinde quldyqta ustaǵan. Ol mundaı qorlyq 10 aı 17 kúnge sozylǵanyn alǵa tartty. Bul aralyqta aqysyn bermek túgili, uryp-soǵyp, zorlyq áreketterin de kórsetken. Endi jábirlenýshiniń anasy halyq pen quqyq qorǵaý organdarynan kómek suraıdy.

«Balamdy alǵash kórgende shoshyp kettim. Onyń qulaǵy jyrtylǵan. «Nege aıtpadyń?» desem, «Telefon shalǵanda qasymda bireýi ne pyshaq, ne armatýra ustap turady. Basqa sóz aıtqyzbaıdy» dep jaýap qatty.

Qorlyq kórgen jigittiń ózi Álfarabımen tanysqanyna birneshe jyl bolǵanyn, tipti bir kezderi birge páter jaldap turǵanyn aıtty.

«Men quldyqta bolǵan jer – Soltústik Qazaqstan oblysynyń Ýálıhanov aýdanyna qarasty Jasqaırat aýyly. 2021 jyly aıaldamada tanystyq, bir aptadaı birge páter jaldap turdyq. Sosyn olar aýylyna ketti de men Almatyǵa kettim. Biraq telefon arqyly habarlasyp turdyq. 2023 jyly áýejaıda jumys istep júrgenmin. Ol meni «jumys bar, 500-600 myń teńge tóleımin, kelemin deseń, jolyńa bılet alyp bereıin» dedi. Negizi Túrkııaǵa ketýge qujat jınap júrgenmin. 28 qyrkúıek kúni Almatydan Astanaǵa keldim. Sóıtip ári qaraı aýylǵa kettik, biraq naqty olardyń aýylyna baratynymyzdy da bilgen joqpyn. Shóp shabatynymyzdy, meniń Álfarabıge kómektesetinimdi aıtqan. Bir aptadaı bári jaqsy boldy, biraq jumysqa kirise almadyq. Men odan jumysty qashan bastaıtynymyzdy suradym. Bir kúni dosymen birge iship kelip: «Iýjan, ejık, kete almaısyń, ketetin bolsań, ketýshi ediń» dep tıisti», — dedi jas jigit.

Onyń sózinshe, osy jaıttan soń ol qashyp ketken. Biraq aınalanyń bári sý bolǵandyqtan, alysqa kete almapty. Kóp uzamaı álgiler artyn qýyp jetip, ony uryp-soǵyp, tipti óziniń qaryz alǵany, endi ony qaıtarý kerektigi jaıly qolhat jazdyryp alǵan. Munymen qoımaı, vıdeoda da óz erkimen kelgeni týraly aıtqyzǵan.

Osylaısha, on aı boıy ol ózin quldyqta ustaǵan otbasynyń malyn baǵyp, shóbin jaıǵastyryp, basqa da usaq-túıek sharýasyn atqaryp kelgen. Al onyń jumysy unamaı qalsa, qolyna túsken zatpen urady eken.

«Ákesi de aıyrmen, kúrekpen urdy. Qysta dosy Tolqyn ekeýi iship kelip, zorlyq áreketterin kórsetti. Tipti qolyn shalbaryma saldy. Úıdegilerden eki ret aqsha aldyrtty. Iaǵnı meniń búıregime operaııa jasap jatyr dep habarlasty. Áıeli medbıke sekildi habarlasty», — deıdi ol.

Qazir bul oqıǵanyń mán-jaıy anyqtalyp jatyr.