جاڭالىقتار
دسم كوروناۆيرۋسقا بايلانىستى مالىمدەمە جاسادى
فوتو: اشىق دەرەككوز
دەنساۋلىق ساقتاۋ مينيسترلىگى كوروناۆيرۋس ينفەكتسياسىنا مونيتورينگ جۇرگىزۋ 2022 جىلدان بەرى جرۆي جانە تۇماۋ بويىنشا قولدانىستاعى ەپيدقاداعالاۋ جۇيەسىنە ەنگىزىلگەنىن ايتتى, – دەپ حابارلايدى qandastar.kz ۆەدومستۆونىڭ ءباسپاسوز قىزمەتىنە سىلتەمە جاساپ.
مونيتورينگ قازىرگى تاڭدا ەلدە رەسپيراتورلى ۆيرۋستار, سونىڭ ىشىندە كۆي اينالىمى دا بايقالاتىنىن كورسەتتى.
وسى جىلدىڭ باسىنان بەرى كۆي بويىنشا 1 290 جاعداي تىركەلدى. قايتىس بولعاندار جوق. بۇل رەتتە جرۆي, ۆيرۋستى پنەۆمونيا جانە كۆي جۇقتىرىپ اۋرۋحاناعا تۇسكەندەردىڭ جوقتىعىن ايتا كەتۋ كەرەك, بۇل كۆي بويىنشا دەرت اعىنى جەڭىل تۇردە ءوتىپ جاتقانىن كورسەتەدى.
سونىمەن, سەكۆەنيرلەۋدىڭ سوڭعى دەرەكتەرىنە سايكەس, قازاقستاندا الەمدەگىدەي 100 پايىز جاعدايدا وميكرون شتاممىنىڭ ءتۇرلى نۇسقالارى اينالىستا ءجۇر.
قر مەملەكەتتىك باس دارىگەرىنىڭ م.ا. 2024 جىلعى 16 تامىزداعى №7 «2024-2025 جىلعى ەپيدەميالىق ماۋسىمدا تۇماۋ, وتكىر رەسپيراتورلى ۆيرۋستى ينفەكتسيا (جرۆي) جانە كوروناۆيرۋس ينفەكتسياسى (COVID-19) بويىنشا سانيتارلىق-پروفيلاكتيكالىق, سانيتارلىق-ەپيدەمياعا قارسى ءىس-شارالار وتكىزۋ تۋرالى» قاۋلىعا قول قويدى.
قاۋلىدا جرۆي, تۇماۋ جانە COVID-19 بويىنشا ەپيدەميالىق ماۋسىم مەرزىمىنە پروفيلاكتيكالىق جانە ەپيدەمياعا قارسى ءىس-شارالار, سونىڭ ىشىندە:
- 2024 جىلدىڭ 1 قىركۇيەگىنەن باستاپ تۇماۋعا قارسى ۆاكتسيناتسيا جۇرگىزۋ;
- مەديتسينالىق ۇيىمداردا: كىرەبەرىستى «سۇزگى» جۇمىسىمەن قامتاماسىز ەتۋ, بەتپەردە تاعۋ, انتيسەپتيكتەردىڭ بولۋى;
- جرۆي, تۇماۋ بايقالعان ءبىر جاسقا دەيىنگى سابيلەر مەن جۇكتى ايەلدەردىڭ ۇيگە شاقىرتۋىنا ءبىرىنشى كەزەكتە قىزمەت كورسەتۋ قاراستىرىلعان.
تۇماۋ, جرۆي, كۆي اۋرۋلارىنىڭ الدىن الۋ ءۇشىن كەلەسىدەي پروفيلاكتيكالىق شارالار جۇرگىزۋ ۇسىنىلادى: عيماراتتىڭ ءىشىن ءجيى-ءجيى جەلدەتىپ وتىرۋ, قولدى تازا ۇستاۋ ءۇشىن انتيسەپتيكالىق قۇرالداردى پايدالانۋ, ناۋقاس ادامدارمەن بايلانىستى شەكتەۋ, اۋىرىپ تۇرعان ادامدارمەن بايلانىسقان جاعدايدا بەتپەردە تاعۋ, مەديتسينالىق كومەككە دەر كەزىندە جۇگىنۋ.
