دۋلات يسابەكوۆ مۇحتار ماعاۋيننىڭ قازاسىنا قاتىستى پىكىر ءبىلدىردى

فوتو: اشىق دەرەككوز

ول ءبىر كەزدەرى ءباسپاسوز بەتىندە وزىمەن ايتىسقان ۇلى جازۋشىنىڭ ۇلت الدىنداعى جاقسىلىعىن ايتىپ, ارۋاعىنان كەشىرىم سۇرادى, – دەپ حابارلايدى qandastar.kz Aykin.kz-كە سىلتەمە جاساپ.

بۇل تۋرالى جازۋشى د.يسابەكوۆ “حابار” تەلەارناسىنىڭ “7 كۇن” ساراپتامالىق باعدارلاماسىنا بەرگەن سۇحباتىندا ايتتى.

“مۇحتار ماعاۋيننىڭ قازاسىن ەستىگەندە وتىرىپ قالدىم. ويپىرىم-اي, كەشە عانا ساۋ ادام سياقتى ەدى, ەكەۋىمىز ايتىسىپ ءجۇر ەدىك قوي. بۇل قالاي بولعانى? تىرشىلىگىڭدە ولمەيتىندەي جۇرەدى ەكەنسىڭ”, – دەدى جازۋشى-دراماتۋرگ.

يسابەكوۆ ماعاۋيندى ۇزاق جاسايدى, وزىنەن كەيىن ومىردەن وتەتىن شىعار دەپ ويلاعان ەكەن.

“قايتىس بولادى دەگەن ويىمدا جوق ەدى. كەيدە مۇحاڭدى ء“اي, مەنەن كەيىن قايتىس بولاتىن شىعار” دەپ ويلايتىنمىن”, – دەپ ءسوزىن جالعادى جازۋشى.

ءسوز سوڭىندا يسابەكوۆ كەزىندە ماعاۋينمەن وزىمەن ءباسپاسوز بەتىندە ءبىراز ايتىسقانىن ەسكە ءتۇسىرىپ, كەشىرىم سۇرادى. جانە دە قازاق حالقىنا ۇلكەن ادەبي, رۋحاني ولجا قالدىرىپ كەتكەنىن اتاپ ءوتتى.

“ال, اينالايىن, مۇحا! ارتىق ايتىپ قويعان بولسام, ارۋاعىڭ كەشىرسىن. ارتىق ايتقان ەشنارسەم جوق سياقتى دەپ ويلايمىن. ەگەر دە سولاردىڭ ءبىرىن ارتىق دەپ ساناساڭ, كەشىرىم سۇرايمىن! قازاق حالقى ءۇشىن ۇلكەن ولجا قالدىرىپ كەتتىڭ. ءوزىڭ كەتتىڭ, ارتىڭدا مۇحتار دەگەن اتىڭ, شىعارمالارىڭ ماڭگىلىك قالدى”, – دەدى دۋلات يسابەكوۆ