Dýlat Isabekov Muhtar Maǵaýınniń qazasyna qatysty pikir bildirdi

Foto: ashyq derekkóz

Ol bir kezderi baspasóz betinde ózimen aıtysqan uly jazýshynyń ult aldyndaǵy jaqsylyǵyn aıtyp, árýaǵynan keshirim surady, – dep habarlaıdy qandastar.kz Aykin.kz-ke silteme jasap.

Bul týraly jazýshy D.Isabekov “Habar” telearnasynyń “7 kún” saraptamalyq baǵdarlamasyna bergen suhbatynda aıtty.

“Muhtar Maǵaýınniń qazasyn estigende otyryp qaldym. Oıpyrym-aı, keshe ǵana saý adam sııaqty edi, ekeýimiz aıtysyp júr edik qoı. Bul qalaı bolǵany? Tirshiligińde ólmeıtindeı júredi ekensiń”, – dedi jazýshy-dramatýrg.

Isabekov Maǵaýındi uzaq jasaıdy, ózinen keıin ómirden ótetin shyǵar dep oılaǵan eken.

“Qaıtys bolady degen oıymda joq edi. Keıde Muhańdy “Áı, menen keıin qaıtys bolatyn shyǵar” dep oılaıtynmyn”, – dep sózin jalǵady jazýshy.

Sóz sońynda Isabekov kezinde Maǵaýınmen ózimen baspasóz betinde biraz aıtysqanyn eske túsirip, keshirim surady. Jáne de qazaq halqyna úlken ádebı, rýhanı olja qaldyryp ketkenin atap ótti.

“Al, aınalaıyn, Muha! Artyq aıtyp qoıǵan bolsam, árýaǵyń keshirsin. Artyq aıtqan eshnársem joq sııaqty dep oılaımyn. Eger de solardyń birin artyq dep sanasań, keshirim suraımyn! Qazaq halqy úshin úlken olja qaldyryp kettiń. О́ziń kettiń, artyńda Muhtar degen atyń, shyǵarmalaryń máńgilik qaldy”, – dedi Dýlat Isabekov