جاڭالىقتار
«دۇمشە مولدالاردىڭ ساندىراعىنا زاڭدى تۇردە تيىم سالۋ كەرەك» – جۋرناليست
فوتو: اشىق دەرەككوز
تانىمال جۋرناليست «دۇمشە مولدالاردىڭ ساندىراعىنا زاڭدى تۇردە تيىم سالۋ كەرەگىن» ايتىپ, ءدىندارلاردى وتكىر سىنعا الدى, دەپ حابارلايدى qandastar.kz Alash.kz ۇلتتىق پورتالى.
قازاقستاندا ءدىني ۋاعىزدارعا تىيىم سالۋ ماسەلەسى قوعامدا قىزۋ تالقىعا ءتۇسىپ جاتىر. بۇل جايلى جۇرتتىڭ بالاسى ارناسى جازدى.
اسىرەسە, كەيبىر ۇستازداردىڭ ءدىني دارىستەرىندە ايتىلاتىن پىكىرلەردىڭ قوعامنىڭ كەيبىر بولىگىنە, اسىرەسە ءداستۇرلى قۇندىلىقتاردى قولدايتىن ازاماتتارعا ۇناماي قالۋى بايقالۋدا.
اقىلعا سىيمايتىن جانە قوعامدا الاۋىزدىق تۋدىرۋى مۇمكىن ۋاعىزداردىڭ كوبەيىپ كەتۋى ەلدىڭ رۋحاني تۇراقتىلىعىنا قاۋىپ ءتوندىرىپ وتىر.
وسىعان بايلانىستى كوپتەگەن ازاماتتار مەن قوعامدىق ۇيىمدار مەملەكەتتىك ورگانداردان مۇنداي ۋاعىزدارعا شەكتەۋ قويۋدى تالاپ ەتۋدە.
بۇل ماسەلە ءدىن مەن مەملەكەتتىڭ قارىم-قاتىناسى, ءسوز بوستاندىعى جانە قوعامداعى ءدىني تولەرانتتىلىق تۇرعىسىنان ماڭىزدى سۇراقتار تۋىنداتادى. ەگەر تىيىم سالۋ شارالارى قولعا الىنسا, مەملەكەت حالىقتىڭ ءدىني سەنىمدەرىن شەكتەمەي, كەرىسىنشە, ەلدەگى ءدىني كەلىسىم مەن تۇراقتىلىقتى ساقتاۋ ءۇشىن قولدانىلاتىن جاڭا ەرەجەلەر مەن نورمالاردى ازىرلەۋى قاجەت بولۋى مۇمكىن.
ايتا كەتەلىك, وسىعان دەيىن اتىشۋلى قابىلبەك ۇستاز «قازاقتىڭ 70 پايىز ءسوزى ارابتىكى…» دەپ ايدى اسپاننان ءبىر-اق شىعارعان ەدى.
«ەگەر اراب سوزدەرىنەن باس تارتساق, قازاق سوزدىگىنىڭ قولدانىستاعى 70 پايىز سوزىنەن باس تارتۋىمىز كەرەك. مىسالى, «راحمەت, شۇكىر, ۇستاز, داپتەر, تاۋبە» دەگەن سوزدەر ارابتىڭ سوزدەرى. ودان كەيىن تىلدىك قورىمىزداعى سوزدەردىڭ 30 پايىزدايى ورىستاردان ەنگەن. سوندا بىزدە نە قالدى? دەگەن سۇراق بار. «سەندەر ارابقۇلسىڭدار» دەيدى. مىسالى, شۇكىر مەن راحمەت ارابتىڭ ءسوزى ەكەنىن ايتتىم عوي. مەن وسى سوزدەردىڭ ورنىنا نە ايتامىن?, – دەگەن بولاتىن قابىلبەك ءالىپباي ۇلى.
وسى ورايدا تانىمال جۋرناليست داۋرەن قۋات داۋلى پىكىر بىلدىرگەن ۇستازعا قارسى شىقتى.
«بولدى ەندى, جەتەدى! «كينو اياقتالدى», جىگىتتەر! قازاقتىڭ جۇيكەسىن جۇندەي ءتۇتىپ, قاجاي بەرۋدىڭ قاجەتى جوق. بۇدان ارى قاراي قاجالا بەرسە, قازاق ۇلتىنىڭ جۇيكەسى شىداس بەرمەي, تۇتاس حالىق ۇساقتالىپ, توبىرعا اينالىپ كەتۋى مۇمكىن. سوندىقتان ءداستۇرلى باق-تان باستاپ بارلىق الەۋمەتتىك پلاتفورمالاردان ساندىراق ءسوز بەن سۇحباتتارعا زاڭدى تۇردە تيىم سالىنۋى كەرەك.
ءدىن جايىندا سويلەسە, ءدىن بىلگىرلەرى, تەولوگتار عانا سويلەسىن. يۋتۋب پەن تيكتوكتان شىعىپ الىپ, لاعىپ وتىراتىنداردىڭ اۋزدارىن جاپقان ابزال. قمدب ۇسىنىس جاساسىن, ءتيىستى ورىندار ءتيىستى شارالاردى قولعا السىن. ايتپەسە, مۇنىڭ اقىرى, جامان ايتپاي جاقسى جوق, سۇمدىق بولادى», – دەيدى داۋرەن قۋات.
