جاڭالىقتار
دۇنيەجۇزى حالقىنىڭ جارتىسى كوز تىگەدى: استانادا شىۇ سامميتىنە دايىندىق قالاي جۇرگىزىلدى?
فوتو: md.sputniknews.ru
استانادا ەكى كۇننەن كەيىن شانحاي ىنتىماقتاستىق ۇيىمىنىڭ ءسامميتى وتەدى. وعان ەۋرازيا قۇرلىعىنىڭ تۇكپىر-تۇكپىرىنەن كوپتەگەن رەسمي دەلەگاتسيالار كەلەدى. قازىرگى كەزدە 16 ەلدىڭ پرەزيدەنتى مەن ۇكىمەت باسشىسى سامميتكە قاتىساتىنىن راستادى. بۇدان بولەك, ونداعان حالىقارالىق ۇيىمنىڭ وكىلدەرى, ءتىپتى, بۇۇ باس حاتشىسى دا كەلۋگە نيەتتى. Sputnik قازاقستان تىلشىسى استانانى ارالاپ, شىۇ سامميتىنە دايىندىق شارالارىن كورىپ قايتتى.
سامميت جاڭا فورماتتا وتەدى
شانحاي ىنتىماقتاستىق ۇيىمىنا 9 مەملەكەت كىرەدى. استاناداعى سامميتتە بەلارۋس تا ۇيىم قاتارىنا قابىلدانادى دەگەن جوسپار بار. سوسىن وسى جولعى سامميت جاڭا فورماتتا وتەدى. مەملەكەت باسشىلارى كەڭەسىنىڭ وتىرىسى مەن «شىۇ+» كەزدەسۋى ۇيىمداستىرىلادى. وعان تاعى التى مەملەكەت شاقىرىلدى. وسىلايشا, استاناعا دۇنيەجۇزى حالقىنىڭ جارتىسىنا جۋىعى تۇراتىن مەملەكەتتەردىڭ باسشىلارى كەلەدى. ولاردىڭ ىشىندە قىتاي, يران, ءۇندىستان, رەسەي, تۇركيا, قاتار, ءباا جانە تاعى باسقا ەلدەر بار. سول سەبەپتى قاۋىپسىزدىك شارالارى كۇشەيتىلدى.
بۇعان دەيىن قالانى تولىعىمەن جاۋىپ تاستايدى دەگەن قاۋەسەت تاراعان. الايدا ىشكى ىستەر مينيسترلىگى ونى جوققا شىعاردى.
استاناعا ەمىن-ەركىن كىرىپ شىعۋعا بولادى. بىراق سامميت وتەتىن كۇندەرى كەيبىر جەرلەردە كولىك پەن ادام قوزعالىسىنا شەكتەۋلەر ەنگىزىلەدى. وعان دەيىن جول جوندەۋشىلەر رەسمي دەلەگاتسيالار ءجۇرىپ وتەتىن كوشەلەردى تولىعىمەن جاڭارتىپ شىعۋعا ءتيىس.
سونداي-اق, اكىمدىك 2 شىلدەدەن باستاپ مەملەكەتتىك جانە كۆازيمەملەكەتتىك ۇيىمداردا قىزمەتكەرلەردىڭ 70 پروتسەنتىن قاشىقتان جۇمىس ىستەۋ فورماتىنا اۋىستىرۋعا كەڭەس بەردى. ال 3-4 شىلدە كۇندەرى بالاباقشالار جۇمىس ىستەمەيدى. وسىلايشا, قالا باسشىلىعى كولىك كەپتەلىسىن ازايتۋدى جوسپارلاپ وتىر.
ماڭگىلىك ەل قالاي وزگەردى
استانادا رەسمي دەلەگاتسيالاردىڭ بارلىعى ماڭگىلىك ەل داڭعىلىمەن وتەدى. بىلتىر ول جەردە اۋقىمدى قۇرىلىس جۇمىستارى باستالعان. تروتۋارلاردا كەسپە تاستار تولىعىمەن اۋىستىرىلىپ, جولدىڭ بويىمەن مىڭداعان اعاش پەن بۇتالار وتىرعىزىلدى. ال ءساميتتىڭ الدىندا شامداردى تولىعىمەن اۋىستىرىپ تاستادى. قازىر تروتۋارلاردا جانە جولدىڭ بويىندا ەۋروپالىق ۇلگىدە شامدار ورناتىلدى. «ماڭگىلىك ەل» اركاسىنىڭ جانىنان وتكەندە قۇددى ءبىر پاريجدە جۇرگەندەي بولاسىڭ.
ماڭگىلىك ەلدىڭ بويىندا اۆتوبۋس جولاعى سىزىلدى. ونى شىۇ سامميتىنەن كەيىن 10 شىلدەدە ىسكە قوسادى. ۆەلوسيپەد جولدارى دا جاڭادان توسەلدى. بىراق 5 شىلدەگە دەيىن ساموكاتپەن جۇرۋگە تىيىم سالىندى.
تاۋەلسىزدىك سارايى جارقىراپ كەتتى
استاناداعى تاۋەلسىزدىك سارايىن دا شىۇ-عا ارنايى دايىنداعان سياقتى. بىلتىر وسى عيماراتتى تولىعىمەن بۇزىپ تاستادى, قاڭقاسى عانا قالعان. كۇردەلى جوندەۋ جۇمىستارى ءبىر جىلداي جۇرگىزىلدى.
عيماراتتىڭ بۇرىنعى سۇلباسى قالدى. بىراق كىرەبەرىس اركا ۇلكەيتىلگەن. بۇرىن سىرتى ءوزارا قيىلىسىپ تۇراتىن تەمىر قۇبىرلارمەن قاپتالىپ تۇرسا, قازىر اپپاق تاسپالارمەن وراپ, قيىلىسقان جەرلەرىن شەگەمەن بەكىتىپ قويعانداي جاسادى.
تۇندە كىرەبەرىس اركا دا, تاسپالار دا ءتۇرلى تۇسكە بويانىپ, جانىپ تۇرادى.
قازاقستان پرەزيدەنتى قاسىم-جومارت توقاەۆتىڭ ايتۋىنشا, بيىل قازاقستاندا حالىقارالىق شارالار كوپ وتەدى. ال استاناداعى شانحاي ىنتىماقتاستىق ۇيىمىنىڭ ءسامميتى كەيىنگى بىرنەشە جىل ىشىندەگى جوعارى دەڭگەيدە وتەتىن اسا ماڭىزدى حالىقارالىق فورۋمداردىڭ ءبىرى بولىپ سانالادى.
«مۇنداي اۋقىمدى شارانىڭ وتكىزىلۋى ەلىمىزدىڭ جاھاندىق ارەناداعى بەدەلىنىڭ زور ەكەنىن كورسەتەدى. ەلىمىز بيىل شىۇ-دان باسقا تاعى بەس حالىقارالىق قۇرىلىمعا توراعالىق ەتىپ وتىر. بۇل – قازاق ديپلوماتياسىنىڭ تاريحىندا بۇرىن-سوڭدى بولماعان جەتىستىك», — دەيدى توقاەۆ.
«مۇنداي اۋقىمدى شارانىڭ وتكىزىلۋى ەلىمىزدىڭ جاھاندىق ارەناداعى بەدەلىنىڭ زور ەكەنىن كورسەتەدى. ەلىمىز بيىل شىۇ-دان باسقا تاعى بەس حالىقارالىق قۇرىلىمعا توراعالىق ەتىپ وتىر. بۇل – قازاق ديپلوماتياسىنىڭ تاريحىندا بۇرىن-سوڭدى بولماعان جەتىستىك», — دەيدى توقاەۆ.
