دجەي لو كونتسەرتىندە جۇمىس ىستەگەن كامەلەتكە تولماعان ۆولونتەرلەر ۇيىمداستىرۋشىلارعا شاعىمداندى

فوتو: ۆيدەودان سكرين

10 تامىزدا الماتىدا دجەننيفەر لوپەستىڭ كونتسەرتى ءوتتى. بۇل وقيعا بيلەت ساتۋ كەزەڭىندە-اق ۇلكەن رەزونانس تۋدىرعان ەدى. ال كونتسەرتتەن كەيىن تاعى ءبىر جانجال شىقتى, دەپ جازدى qandastar.kz

الەۋمەتتىك جەلىدە ءىس-شاراعا كومەكتەسكەن ۆولونتەرلەردىڭ شاعىمدارى جاريالاندى. ولاردى ەرەكشە تاجىريبە مەن شوۋ كورۋ مۇمكىندىگى ۋادەسىمەن شاقىرعان, بىراق سوڭىندا 12 ساعات بويى سۋسىز, تاماقسىز ۇستاعان. ستاديوندى تازالاتقىزعان جانە كونتسەرتتەن كەيىن ۋادە ەتىلگەن ترانسفەردى دە ۇيىمداستىرماعان. ءمان-جايدىڭ قالاي بولعانىن Stan.kz اقپارات اگەنتتىگى ۇيىمداستىرۋشىلاردان سۇراپ كوردى.

كونتسەرتتەگى ۆولونتەرلەردىڭ كوبى كامەلەتكە تولماعاندار بولدى. قۇرالاي ەسىمدى ۆولونتەر جەلىدەگى پاراقشاسىندا تاڭعى 35°C اپتاپتا تۇسكى اسسىز, ءبىر بوتەلكە سۋدى بىرنەشە اداممەن ءبولىسىپ ءىشىپ جۇمىس ىستەگەنىن ايتتى.

«كونتسەرتتە ۆولونتەر بولدىم جانە ءبىزدىڭ دە ۇيىمداستىرۋعا كوڭىلىمىز تولمادى. ايتا كەتەيىن, ءبىزدىڭ ەڭبەگىمىزگە اقى تولەنگەن جوق. ءبىز بيلەتكە دە, كەزەككە دە ورىن ساتپادىق. قىزعىلت سارى جيلەت نەمەسە سوعان ۇقساس فۋتبولكا كيگەن ادامدار تەك ادامدارعا باعىت-باعدار كورسەتۋگە جاۋاپتى بولدىق. كەيىن ءبىزدى ۇزاق كەزەكتەگى يىقتىرەستى تارقاتىپ, جينالعانداردى سابىرعا شاقىرۋعا قويدى», – دەپ جازدى ۆولونتەر قۇرالاي.

قۇرالايدىڭ سوزىنشە, كەلىسىمشارت بويىنشا ۇيىمداستىرۋشىلار جۇمىس باستالعاننان كەيىن ءتورت ساعاتتان سوڭ بىزگە سۋ مەن تاماق, سونداي-اق ترانسفەر ۇسىنۋى كەرەك بولعان.

«بىراق ۇيىمداستىرۋشىلار بىزگە ءۇزىلدى-كەسىلدى شارت قويىپ, ءبىزدىڭ كىرەبەرىستەن بارلىق ادامدى وتكىزىپ بولعانشا تاماقتانبايتىنىمىزدى ايتتى. ويتكەنى ءبىزدى الماستىراتىن ەشكىم جوق ەكەن. ءبىزدىڭ كوپشىلىگىمىز كامەلەتكە تولماعانبىز. ءسويتىپ, ءبىزدىڭ سەكتور تاماقتى تەك ساعات 21:00-دە, ياعني 10 ساعات جۇمىس ىستەگەننەن كەيىن عانا جەدى. سۋ ءبىر-اق رەت بەرىلدى, ول دا جەكە بوتەلكە ەمەس, 4-5 ادامعا ءبىر بوتەلكەدەن بولدى. كونتسەرتتەن كەيىن ءبىز ستاديون اۋماعىن تازالاۋىمىز كەرەك ەكەنى, ال ترانسفەر بولمايتىنى بەلگىلى بولدى. سونىمەن قاتار بىزگە «ساعات 23:00 بولعاندىقتان پوليتسياعا ۇستالىپ قالماۋ ءۇشىن تەزىرەك كەتىڭدەر» دەپ ايتتى. سوندىقتان, وتىنەمىن, جالعان اقپارات تاراتپاڭىزدار», – دەپ ءتۇسىندىردى قۇرالاي.