لوپەستىڭ ساپارى: مادەني وقيعا ما, ساياسي سيگنال ما?

فوتو: اشىق دەرەككوز

جۋرناليست, اسكەري ساراپشى امانگەلدى قۇرمەت Qasqa Jol ارناسىنا بەرگەن سۇحباتىندا سوڭعى جىلدارى قازاقستاندا مادەني ءىس-شارالار بەلسەندى تۇردە ۇيىمداستىرىلىپ جاتقانىن جانە بۇل ءۇردىستىڭ بەلگىلى ءبىر گەوساياسي فاكتورلارمەن بايلانىستى ەكەنىن ايتتى. ونىڭ پىكىرىنشە, دجەننيفەر لوپەس سەكىلدى الەمدىك جۇلدىزداردىڭ قازاقستانعا كەلۋى كەزدەيسوق ەمەس, دەپ جازادى qandastar.kz

«2022 جىلدان بەرى شەتەلدىك تانىمال ارتىستەر قازاقستانعا كەلە باستادى. بۇل – رەسەي مەن ۋكراينا اراسىنداعى سوعىس جاعدايىنىڭ جاناما اسەرى. كوپتەگەن ونەر ادامدارى سوعىس ءجۇرىپ جاتقان ايماقتارعا بارۋدان باس تارتىپ, بەيتاراپ ءارى قاۋىپسىز ەلدەرگە بەت بۇرۋدا. قازاقستان – وسى باعىتتاعى تاڭداۋلى ەلدەردىڭ ءبىرى», – دەدى جۋرناليست.

ونىڭ ايتۋىنشا, بۇل ءۇردىس قازاقستاننىڭ مادەني كەڭىستىگى مەن ەكونوميكاسىنا وڭ اسەرىن تيگىزۋدە.

سونىمەن قاتار, سۇحباتتا تۇركيا مەن قازاقستان اراسىنداعى سوڭعى ۋاقىتتاعى تىعىز قارىم-قاتىناستار دا ءسوز بولدى. الەۋمەتتىك جەلىلەردە بۇل بايلانىستىڭ رەسەيمەن اراداعى قاتىناسقا ىقپال ەتۋى مۇمكىن دەگەن پىكىرلەر ايتىلىپ ءجۇر.

«اقتاۋداعى ۇشاق اپاتىنان كەيىن ءازىربايجان مەن رەسەي اراسىندا ازداعان تۇسىنىسپەۋشىلىك تۋىنداعان تۇستا قازاقستان پرەزيدەنتى تۇركياعا رەسمي ساپارمەن بارىپ, ەكىجاقتى قورعانىس, ەكونوميكا جانە مادەني دامۋ سالالارىندا 18 كەلىسىمگە قول قويدى. تۇركيا پرەزيدەنتى رەجەپ تايىپ ەردوعاننىڭ جىلى قارسى الۋى مەن ەكى ەل باسشىلارىنىڭ قول ۇستاسقان سۋرەتى الەۋمەتتىك جەلىلەردە ءتۇرلى پىكىر تۋعىزدى. دەگەنمەن, بۇل – ارانداتۋعا نەگىز بولارلىق جايت ەمەس», – دەدى امانگەلدى قۇرمەت.

ول سونداي-اق رەسەي تاراپىنان بۇل ماسەلەگە قاتىستى ءتۇرلى پىكىرلەر ايتىلىپ جاتسا دا, رەسمي بيلىك سالقىنقاندى پوزيتسيا ۇستاناتىنىن, ديپلوماتيالىق قارىم-قاتىناستىڭ بايسالدى ەكەنىن اتاپ ءوتتى.

«رەسەيدىڭ رەسمي بيلىگى قازاقستانمەن سالقىندىققا جول بەرمەيدى. بۇل – قالىپتى ديپلوماتيالىق پروتسەسس. تۇركيامەن اراداعى كەزدەسۋ مەن كەلىسسوزدەردى اسىرەلەۋدىڭ قاجەتى جوق», – دەپ تۇيىندەدى جۋرناليست.