دجونني دەپپتىڭ ادۆوكاتى مەن ادىلەت مينيسترلىگىنىڭ اراسىندا قانداي بايلانىس بار?

فوتو: راديو ونلاين

امەريكالىق زاڭگەر كاميللا ۆاسكەس گولليۆۋد جۇلدىزى دجونني دەپپتىڭ ادۆوكاتى رەتىندە تانىمال. بىراق ونىڭ ودان دا قۇرمەتتى كليەنتى بار بولىپ شىقتى. ول –  قازاقستاننىڭ ادىلەت مينيسترلىگى. ۆاسكەس حانىمنىڭ ادىلەت مينيسترلىگىن قانداي قىزمەتپەن قامتىپ, قانشا قاراجاتتى قالتاعا باسقانىن qandastar.kz تالداپ كوردى.

بىرىنشىدەن, دجونني دەپپتىڭ ايەلى ەمبەر حەردپەن اجىراسۋ پروتسەسىندە كوزگە تۇسكەن ەكى زاڭگەر – كاميللا ۆاسكەس پەن بەندجامين چۋ قازاقستاندا قايدان ءجۇر? بەلگىلى بولعانداي, قوس زاڭگەر شىلدەدە استانادا ستۋدەنتتەرمەن كەزدەسۋدە باس قوسقان. بۇل تۋرالى جەرگىلىكتى, ءتىپتى حالىقارالىق باق, سونىڭ ىشىندە The Times of Central Asia جازدى. رەسمي تۇردە امەريكاندىق زاڭگەرلەر «گەندەرلىك تەڭدىك جانە ايەل قۇقىعىن نىعايتۋ ماسەلەلەرى بويىنشا» تاجىريبەلەرىن ورتاعا سالدى-مىس.

الايدا, الەمگە ايگىلى Brown Rudnick زاڭ فيرماسى ءتىس قاققان زاڭگەرلەردى قازاقستانعا تەك ستۋدەنتتەرمەن تىلدەسسىن دەپ جىبەرمەگەنى انىق. وrda.kz جازعانداي, ادىلەت مينيسترلىگى ءدال وسى حالىقارالىق زاڭ فيرماسىمەن اقپان ايىنان باستاپ رەسمي كەلىسىمشارتقا وتىرعان. ال بۇل كەلىسىم بويىنشا قازاقستان مۇددەسىن ۆاسكەس قورعايدى.

Brown Rudnick زاڭ فيرماسىنىڭ قر ادىلەت ۆيتسە-ءمينيسترى دەنيەل ۆايسوۆپەن شارتى 28 اقپاندا جاسالعان جانە 2024 جىلدىڭ سوڭىنا دەيىن جارامدى. قۇجاتتى اقش-تىڭ شەتەلدىك اگەنتتەر تۋرالى  زاڭناماسى (FARA) قامتىلعان قۇجاتتاردان تابۋعا بولادى.

سىلتەمە: 1721656126_7376-exhibit-ab-20240228-1

كەلىسىمشارتقا سايكەس, فيرما زاڭگەرلەرى ادىلەت مينيسترلىگىنە مىناداي قىزمەت كورسەتەدى: باق مونيتورينگى, اقش پەن انگليا زاڭناماسىنا سايكەس كليەنتتىڭ مۇددەسىن قورعاۋ, سوتقا دەيىنگى جانە اربيتراجعا دەيىنگى رەتتەۋگە جاردەمدەسۋ. كورپوراتسيانىڭ قىزمەتتەرى شارتتا تىكەلەي كورسەتىلگەن جانە قۇجات ساياسي سيپاتقا يە. ال بۇل جۇمىستاردىڭ جوعارى دەڭگەيدە ورىندالۋى كاميللا ۆاسكەستىڭ موينىندا كورىنەدى. تەك كەلىسىمشارتتىڭ ەڭ قىزىق بولىگى ادىلەت مينيسترلىگى كوتەرەتىن شىعىنعا قاتىستى.

«تاپسىرمالار تاپ-تۇيناق ورىندالادى. تولەم زاڭگەرلەردىڭ جۇمساعان ۋاقىتىنا بايلانىستى. مەنىڭ ءبىر ساعاتتىق جالاقىم – 1260 دوللار», – دەلىنگەن كاميللا ۆاسكەستىڭ كەلىسىمشارتىندا. ال قازىرگى باعام بويىنشا 1260 دوللار سوماسى شامامەن 600 مىڭ تەڭگەگە سايكەس كەلەدى.

بۇگىندە ۆاسكەس حانىمنىڭ مينيسترلىكتىڭ قانداي قۇقىقتىق ماسەلەسىن رەتتەپ جاتقانى بەلگىسىز, بۇل تۋرالى اشىپ ايتۋ دا ەرتە. دەگەنمەن, Brown Rudnick قىزمەتكەرلەرىنىڭ استاناعا ساپارىنان كەيىن-اق (16 شىلدە) ادىلەت مينيسترلىگى مولدوۆالىق بيزنەسمەندەر اناتول جانە گابريەل ستاتيمەن بىتىمگەرشىلىك كەلىسىمگە كەلگەنىن مالىمدەدى.

ال بۇعان دەيىن ستاتيمەن «سوعىس» 14 جىلعا سوزىلعان بولاتىن جانە مەملەكەتكە بۇدان ەداۋىر شىعىن كەلدى.

م.سنادين