ەدىل جاڭبىرشين مەن اسلان ءمۋسيندى نە بايلانىستىرادى?

فوتو: mazhilis_kz

ءماجىلىس دەپۋتاتى ەدىل جاڭبىرشين Adal Adam youtube ارناسىنا بەرگەن سۇحباتىندا وزىنە جاسالعان اقپاراتتىق شابۋىلداردىڭ سەبەبىن ءتۇسىندىردى, دەپ جازدى qandastar.kz

«وليگوپولياعا ۇنامايتىن زاڭدار قابىلدايمىز, جوبالار جاسايمىز. ءاي دەيتىن اجە, قوي دەيتىن قوجاسى جوق, ارنارسەنى بەلدەن باسىپ جۇرگەن مۇناي الپاۋىتتارىن شاقىرىپ الىپ, حالىق قالاۋلىلارىنىڭ الدىندا ەسەپ بەرگىزىپ وتىرعاندىقتان, سولارعا جانە سولاردىڭ مۇددەلەس سىبايلاستارىنا ۇناماۋىمىز مۇمكىن. ءبىز پرەزيدەنتتىڭ ساياساتىن جۇرگىزەتىن ادامبىز, ول كىسى ەلدى جاڭا باعىتقا بۇرىپ, وزگەرىستەر جاساۋعا تالپىنىپ جاتىر. مۇنداي قادامدار دا بۇرىنعىلارعا ۇنامايدى. ويتكەنى, بۇرىنعىلار وزدەرىنىڭ جەم وتىرعان استاۋىنان, مەملەكەت قازىناسىن مايشەلپەك قىلعان سحەمالارىنان ايىرىلعىسى كەلمەيدى. سوندىقتان بىزگە اقپاراتتىق شابۋىلداردىڭ بولاتىنى زاڭدىلىق. بولا دا بەرەدى. بلوگەر-جۋرناليستەردى ادەيى بىزگە جىبەرىپ, شاتاستىرۋ ءۇشىن قۇيتىرقى سۇراقتار قويادى. كەيبىرىنە ءتۇسىپ قالامىز, كەيبىرىنە جاۋاپ بەرىپ جاتامىز. ەندى ءبارىن بىردەي بىلە بەرۋىڭ مۇمكىن ەمەس. اقپاراتتىق «كيللەرلەردىڭ» بولاتىنىن بىلەمىز, بىرەۋ جاسىرىن جاسايدى, بىرەۋ اشىق شابۋىلدايدى. وعان ەتىمىز ۇيرەنگەن. ساياساتقا كەلگەننەن كەيىن بارىنە دايىن بولۋىمىز كەرەك», – دەدى دەپۋتات.

سونىمەن قاتار ول «ەدىل ءجاڭبىرشيننىڭ ساياسي مانسابىنىڭ وسۋىنە پرەزيدەنت اكىمشىلىگىندە بۇرىن باسشى بولعان اسلان مۋسين ىقپال ەتتى» دەگەن قاۋەسەتكە جاۋاپ بەردى.

«مۋسين پرەزيدەنت اكىمشىلىگى باسشىسى بولعان. بىراق ونىمەن ومىرىمدە كەزدەسپەگەم. قىزمەت بابىندا دا جولىقپاعام. تانىمايمىن. تەك سىرتتاي بيوگرافياسىن عانا بىلەم. مەنى اقتاۋ قالاسىنىڭ اكىمى قىلعان سول كەزدەگى ماڭعىستاۋ وبلىسىنىڭ اكىمى باۋىرجان مۇحامەدجانوۆ بولاتىن. ادامدى سەندىرگىڭ كەلسە, وتىرىكتى وكىرتىپ تۇرىپ ايت دەگەن. سونداي پيعىلمەن تاراتىلعان قاۋەسەت شىعار, مەنىڭ بەدەلىمدى, ابىرويىمدى ءتۇسىرۋ ءۇشىن. جالپى مەن تۋرالى نەبىر بالەلەر جازىلدى. ال مەنى تانيتىن ادامدار, قىزمەتتەس بولعان ازاماتتار مەنىڭ قانداي ادام ەكەنىمدى بىلەدى, سوندىقتان ونداي قاڭقۋ سوزدەرگە اقتالمايمىن دا. ەگەر جالعان اقپارات تاراتۋشىلار شەكتەن شىعىپ جاتسا, سوتقا بەرەتىن بولام», – دەدى ەدىل جاڭبىرشين.