Edil Jańbyrshın men Aslan Mýsındi ne baılanystyrady?

Foto: mazhilis_kz

Májilis depýtaty Edil Jańbyrshın Adal Adam youtube arnasyna bergen suhbatynda ózine jasalǵan aqparattyq shabýyldardyń sebebin túsindirdi, dep jazdy qandastar.kz

«Olıgopolııaǵa unamaıtyn zańdar qabyldaımyz, jobalar jasaımyz. Áı deıtin áje, qoı deıtin qojasy joq, árnárseni belden basyp júrgen munaı alpaýyttaryn shaqyryp alyp, halyq qalaýlylarynyń aldynda esep bergizip otyrǵandyqtan, solarǵa jáne solardyń múddeles sybaılastaryna unamaýymyz múmkin. Biz prezıdenttiń saıasatyn júrgizetin adambyz, ol kisi eldi jańa baǵytqa buryp, ózgerister jasaýǵa talpynyp jatyr. Mundaı qadamdar da burynǵylarǵa unamaıdy. О́ıtkeni, burynǵylar ózderiniń jem otyrǵan astaýynan, memleket qazynasyn maıshelpek qylǵan shemalarynan aıyrylǵysy kelmeıdi. Sondyqtan bizge aqparattyq shabýyldardyń bolatyny zańdylyq. Bola da beredi. Bloger-jýrnalısterdi ádeıi bizge jiberip, shatastyrý úshin quıtyrqy suraqtar qoıady. Keıbirine túsip qalamyz, keıbirine jaýap berip jatamyz. Endi bárin birdeı bile berýiń múmkin emes. Aqparattyq «kıllerlerdiń» bolatynyn bilemiz, bireý jasyryn jasaıdy, bireý ashyq shabýyldaıdy. Oǵan etimiz úırengen. Saıasatqa kelgennen keıin bárine daıyn bolýymyz kerek», – dedi depýtat.

Sonymen qatar ol «Edil Jańbyrshınniń saıası mansabynyń ósýine Prezıdent ákimshiliginde buryn basshy bolǵan Aslan Mýsın yqpal etti» degen qaýesetke jaýap berdi.

«Mýsın Prezıdent ákimshiligi basshysy bolǵan. Biraq onymen ómirimde kezdespegem. Qyzmet babynda da jolyqpaǵam. Tanymaımyn. Tek syrttaı bıografııasyn ǵana bilem. Meni Aqtaý qalasynyń ákimi qylǵan sol kezdegi Mańǵystaý oblysynyń ákimi Baýyrjan Muhamedjanov bolatyn. Adamdy sendirgiń kelse, ótirikti ókirtip turyp aıt degen. Sondaı pıǵylmen taratylǵan qaýeset shyǵar, meniń bedelimdi, abyroıymdy túsirý úshin. Jalpy men týraly nebir báleler jazyldy. Al meni tanıtyn adamdar, qyzmettes bolǵan azamattar meniń qandaı adam ekenimdi biledi, sondyqtan ondaı qańqý sózderge aqtalmaımyn da. Eger jalǵan aqparat taratýshylar shekten shyǵyp jatsa, sotqa beretin bolam», – dedi Edil Jańbyrshın.