ەگدە جاستاعى اتا- انالار مەن قاريالاردى الاياقتاردان قالاي ساقتاپ قالۋعا بولادى?

ەگدە جاستاعى اتا-انالار مەن قاريالاردى الاياقتاردان قالاي ساقتاپ قالۋعا بولادى? بۇل سۇراققا جەتىسۋ وبلىسىنىڭ پوليتسەيلەرى جاۋاپ بەردى, — دەپ حابارلايدى Massaget.kz ءتىلشىسى.
سوڭعى ۋاقىتتا, قارت ادامداردىڭ كوبىسى سەنگىش جانە وسال بولعاندىقتان ينتەرنەت-الاياقتاردىڭ قۇرباندارىنا اينالىپ جاتىر.
الايدا, الاياقتاردان ساقتانۋ ءۇشىن بىرنەشە ءتاسىل بار. ەڭ ءتيىمدى شەشىمدەردىڭ ءبىرى نەسيە الۋدان ەرىكتى تۇردە باس تارتۋ.

بۇنى جاساۋ وتە وڭاي. ول ءۇشىن ۇيالى تەلەفونىڭىزعا «Egov mobile» قوسىمشاسىن جۇكتەپ الىپ, جۇيەگە كىرىپ, تىركەلۋ قاجەت. «قىزمەتتەر» باتىرماسىن باسىپ, ىزدەۋ جولاعىندا «باس تارتۋ» ءسوزىن جازۋ كەرەك. سودان كەيىن «بانكتىك نەسيەلەردى, ميكروكرەديتتەردى الۋدان ەرىكتى باس تارتۋ» فۋنكتسياسىن تاڭدايسىز.

ءدال وسىلاي ەگدە جاستاعى اتا- انالارىڭىزدى الاياقتاردان سايقتاي الاسىزدار. ولارعا دا «Egov mobile» قوسىمشاسىنان جەكە كابينەت اشىپ, جوعارىدا ايتىلعان ينسترۋكتسيا بويىنشا جاساۋ قاجەت. وسىلايشا, ولار الاياقتاردىڭ ايلاسىنا ءتۇسىپ قالسا دا, زيانكەستەر نەسيە الا المايدى. سونىمەن بىرگە, قاريا تۋىستارىڭىعا جەكە دەرەكتەرىن ەشكىمگە ەشبىر جاعدايدا بولىسپەۋ كەرەكتىگىن كۇن سايىن ەسكە سالۋدى ۇمىتپاۋلارىڭىزدى سۇرايمىز.

ەستەرىڭىزدە بولسىن, الدانىپ قالعان قارتتاردىڭ كوز جاسى الاياقتاردىڭ جۇرەگىن جىبىتپەيدى. ءسىزدىڭ جانە جاقىندارىڭىزدىڭ قاراجاتىنىڭ قاۋىپسىزدىگى ءسىزدىڭ ساقتىعىڭىز بەن قىراعىلىعىڭىزعا بايلانىستى ەكەنىن ۇمىتپاڭىز!