«ەگىز ۇلدارىمدى 6 اي كورگەن جوقپىن»: قاراعاندىدا تۇراتىن ايەلدىڭ ەكس-كۇيەۋى بالالارىن الىپ, رەسەيگە قاشىپ كەتكەن

قاراعاندى وبلىسى شەت اۋدانى اقجال كەنتىندە تۇراتىن انانىڭ ۆيدەوسى الەۋمەتتىك جەلىدە تاراعان ەدى. رەداكتسيا ءتىلشىسى ونىڭ جەكە بايلانىس نومىرلەرىن تاۋىپ, سۇحبات الدى. يلسيار ناگاەۆا كۇيەۋىمەن الەۋمەتتىك جەلىدە تانىسقانىن ايتىپ بەردى.

«تانىسا سالا ايتقانى — تاتار ۇلتىنىڭ قىزىنا ۇيلەنەمىن دەدى. وسى سوزىنەن قاتتى كۇمانداندىم. بىردەن ايەل قىلىپ الاسىڭ با, الدىمەن تانىسۋ كەرەك شىعار دەدىم. باستاپقىدا ونىڭ ءتۇر-تۇلعاسى, بولمىسى ۇنامادى. بىراق ۋاقىت وتە كەلە ونىڭ شىن پەيىلى, وتباسى قۇرۋعا دەگەن نيەتى مەنى باۋراپ الدى. 2020 جىلدىڭ 13 شىلدەسىندە وتاۋ قۇردىق. ونىڭ اناسى, ياعني مەنىڭ بۇرىنعى ەنەم باسىنان باستاپ ومىرىمىزگە ارالاسا باستادى. مەن وعان ءمان بەرمەۋگە تىرىستىم. سەبەبى كۇيەۋىمدى ول كەزدە جاقسى كورەتىن ەدىم. كەيىن جۇكتى ەكەنىمدى ءبىلدىم. قۇرساعىمدا ەگىز بالا جاتتى. وسىلايشا, قاراعاندىعا كوشىپ, يپوتەكاعا ءۇي الدىق. 2021 جىلدىڭ شىلدەسىندە مەن ەگىز بالامدى بوسانعان سوڭ, وتباسىندا داۋ كوبەيدى. بۇنداي ۇرىس-كەرىس جاس وتباسىلاردىڭ بارىندە بولاتىن شىعار دەپ ءمان بەرمەدىم», — دەيدى ول.

يلسيار ناگاەۆانىڭ ايتۋىنشا, بۇرىنعى جولداسى قاراعاندىدان استاناعا قاراي كوشەيىك دەگەن سوڭ ولار 2022 جىلدىڭ قاراشاسىندا ەلورداعا كەلگەن.

«ونىڭ اناسى ءبىزدىڭ جەكە ومىرىمىزگە ارالاسۋىن توقتاتپادى. ۇيدە ءجيى ۇرىس بولاتىن ەدى. 2024 جىلدىڭ ساۋىرىندە بولماشى نارسە ءۇشىن تاعى دا ۇرسىسىپ قالدىق. قازىر ويلاسام, ول مەنىمەن ۇرسىسىپ, اجىراسۋدىڭ سىلتاۋىن عانا ىزدەگەن سياقتى. ونىڭ تۋىستارى بۇرىنعى كۇيەۋىمدى ماعان قارسى قويا باستادى. مەن ۇيدەن كەتكەنشە بۇرىنعى جولداسىم مەنىمەن سويلەسپەدى. اينالامداعى ادامدار ونىڭ وسىنداي ەكەنىنە سەنبەيتىن. سەبەبى ول سىرتتا وتە سىپايى, قامقورشى بولا قالاتىن. قازىر ونىڭ وسى ارەكەتتەرىن ءتۇسىنىپ جاتىرمىن. 20 مامىردا مەن ودان كەتىپ تىندىم. اقجال كەنتىندە تۇرىپ جاتقان اتا-انامنىڭ قولىنا كەلدىم. ول ماعان ءجيى حابارلاسىپ, شۋ شىعارىپ اۋىلعا دا كەلەتىن», — دەيدى ول.

يلسيار ناگاەۆانىڭ ايتۋىنشا, 9 ماۋسىمدا ادەتتەگىدەي بۇرىنعى كۇيەۋى اۋىلعا كەلىپ, ەگىز بالاسىن كولىككە سالىپ الىپ كەتكەن.

«بۇل جاعدايدىڭ ارتى ۋشىعىپ كەتەدى دەپ ويلاعان جوقپىن. 11 ماۋسىمدا بالالاردىڭ ارتىنان باردىم. بىراق ەنەم مەن بۇرىنعى كۇيەۋىم جولىمدى بوگەپ, پاتەردەن قۋىپ شىقتى. پوليتسيا مەن قامقورشىلار كومەكتەسپەدى. سەندەر ءالى ەرلى-زايىپتىسىڭدار, ونىڭ دا قۇقىعى بار دەدى. مەن بالالار مەنىمەن تۇرۋى كەرەك ەكەنىن ايتىپ, اجىراسۋعا ارىز بەردىم. كەيىن سوت وتىرىستارى باستالدى. ونىڭ تۋىستارى مەنى قورقىتۋدى جالعاستىرا بەردى. ءوز بالالارىمدى 1 تامىزدا سوت بەكىتكەن پسيحولوگيالىق ساراپتاما كەزىندە كوردىم. بالالارىمدى كورە سالا جىلاي بەردىم. كەيىن جولداسىمنىڭ تۋىستارى ولاردى الىپ كەتتى. سودان بەرى ەكى بالامدى كورگەن جوقپىن», — دەيدى يلسيار ناگاەۆا.

يلۆير ناگاەۆ سوت وتىرىسىنا تەك ءبىر رەت قانا كەلگەن ەكەن. قالعان وتىرىستارعا ونىڭ ادۆوكاتى قاتىسقان. سوت شەشىمى ەندى كۇشىنە ەنۋ كەرەك بولعان كەزدە بۇرىنعى كۇيەۋى اپپەلياتسيالىق شاعىم ءتۇسىرىپ, سوت وتىرىسى تاعى ءبىر ايعا سوزىلعان. ول وسى ۋاقىت ىشىندە جۇمىسىنان شىعىپ, ەكى بالامەن رەسەيگە قاشىپ كەتكەن.

«مەنىڭ بار بىلگەنىم وسى عانا. قازىر رەسەيدىڭ قاي قالاسى ەكەنىن دە بىلمەيمىن. قازىر ول اقپاراتتى تابا الاتىندار جۇمىس ىستەپ جاتىر. 6 قاراشادا سوت شەشىمى شىعىپ, زاڭدى كۇشىنە ەندى. مەن استانا قالاسىنداعى سارىارقا اۋداندىق پوليتسياسىنا ارىزداندىم. سونداي-اق e-otinihs ارقىلى دا ارىز جازدىم. ولار ءىستى ۋچاسكەلىك پوليتسياعا بەرگەن», — دەيدى يلسيار ناگاەۆا.

يلسيار ناگاەۆا بۇگىندە كىمنەن كومەك سۇرايتىنىن بىلمەي وتىر. بالاسىن جارتى جىل كورمەگەن انا كۇندىز كۇلكىدەن, تۇندە ۇيقىدان ايىرىلعان. رەداكتسيا بۇل وقيعاعا قاتىستى سارىارقا اۋداندىق پوليتسيا بولىمىنە ىسكە قاتىستى  سۇراۋ جولدادى.