ەgov قوسىمشاسىندا قازاقستاندىقتارعا ۋاقىتتى وزگەرتۋگە قاتىستى بىرنەشە سۇراق قويىلدى

فوتو: اشىق دەرەككوز

قازاقستاندىقتار UTC+5, UTC+6, «ماعان ءبارىبىر» جانە «بىلمەيمىن» دەگەن نۇسقالاردىڭ ءبىرىن تاڭداي الادى.

ەgov ءموبيلدى قوسىمشاسىندا قازاقستاندىقتارعا ۋاقىتتى وزگەرتۋگە قاتىستى بىرنەشە سۇراق قويىلدى, دەپ حابارلايدى qandastar.kz اقپارات پورتالى.

ەلەكتروندى ۇكىمەتتە قازاقستاندىقتاردان قاي ساعات بەلدەۋى ىڭعايلى ەكەنىن انىقتاۋ ءۇشىن ساۋالناما ءوتىپ جاتىر. قازاقستاندىقتار UTC+5, UTC+6, «ماعان ءبارىبىر» جانە «بىلمەيمىن» دەگەن نۇسقالاردىڭ ءبىرىن تاڭداي الادى.

سونداي-اق ۋاقىت بەلدەۋىنە قاتىستى قانداي وزگەرىستى قالايتىندارىن سۇرايدى. «ەشتەڭەنى وزگەرتپەي, ءبارى سول كۇيىندە قالسىن», «ۋاقىتتى جىل مەزگىلىنە (جاز/قىس) قاراي وزگەرتۋ كەرەك», «الدىڭعى ۋاقىتقا ورالۋ كەرەك» دەپ ۇسىنىس بىلدىرە الادى.

سونىمەن قاتار ۇسىنىستى پايدالانۋشىلاردان كۇندىزگى ۋاقىتتا نە نارسەگە ۋاقىت جەتپەيتىنى سۇرالادى.

ساۋالنامانى eGov ءموبيلدى قوسىمشاسىندا «حابارلامالار» بولىمىنەن تابا الاسىز.

ەسكە سالساق, 19 قاراشادا ۇكىمەت وتىرىسىندا قازاقستانداعى بىرىڭعاي ۋاقىت بەلدەۋى تۋرالى سوڭعى شەشىم قابىلداندى. الايدا وسىدان كەيىن بىرىڭعاي ۋاقىت بەلدەۋىنىڭ قازاقستاندىقتاردىڭ دەنساۋلىعىنا اسەرىن زەرتتەۋ ءۇشىن 160 ميلليون تەڭگە جۇمسالاتىنى ايتىلعان.