جاڭالىقتار
«ەكەۋى ەرلى-زايىپتى»: قۇلسارىداعى جارىلىستان قازا تاپقاندار جايلى دەرەكتەر بەلگىلى بولدى
اتىراۋ وبلىسىنىڭ قۇلسارى قالاسىنداعى جانارماي قۇيۋ بەكەتىندە بولعان جارىلىستان مەرت بولعاندارعا قاتىستى مالىمەتتەر بەلگىلى بولدى, دەپ حابارلايدى Qandastar.kz سايتى Atyrauoil.news پاراقشاسىنا سىلتەمە جاساپ.
جارىلىستان قازا تاپقاندار – ەرلى-زايىپتى. ەكەۋى دە جانارماي قۇيۋ بەكەتىندە جۇمىس ىستەگەن.
“جارىلىس بولعان كەزدە 43 جاستاعى ەر ادام تسيستەرنا ىشىندە بولعان. ونىڭ 40 جاستاعى ايەلى سول كەزدە جانارماي قۇيۋ بەكەتىنىڭ عيماراتىندا بولعان. ەكەۋى دە سول جەردە كوز جۇمدى”, – دەپ مالىمدەدى Atyrauoil.news پاراقشاسى.
ءورت ساعات 21:47-دە ءسوندىرىلدى. ال زارداپ شەككەندەر سانى 16 ادامعا دەيىن ءوستى.
وقيعا ورنىندا توتەنشە جاعدايلار دەپارتامەنتى, پوليتسيا جانە تەرگەۋ ورگاندارى جۇمىستى جالعاستىرىپ جاتىر. قايعىلى وقيعانىڭ سەبەپتەرى مەن ءمان-جايى انىقتالىپ جاتىر. قىلمىستىق ءىس قوزعالدى.
